– Det kjennest veldig, veldig godt, seier Magnus Carlsen.
Det har no gått vel ei veke sidan den norske verdsstjerna utklassa Rameshbabu Praggnanandhaa i to omspelsparti i verdscup-finalen.
I dette NRK-intervjuet fortel Carlsen at akkurat denne sigeren smakte spesielt godt.
– Det er få ting eg har hatt meir lyst til å vinne enn det her dei siste par åra. Så det er ei kjempegod kjensle, seier nordmannen.
– Samlinga komplett
Etter at sigeren var eit faktum, publiserte han følgjande «frekke» melding på X/Twitter:
I meldinga skriv Carlsen: «Sjakk?», etterfølgd av ein GIF med teksten «fullført det». Meldinga har fått fleire enn 43.000 likes og har i skrivande stund vorte sett av 1,7 millionar brukarar.
– Kva meinte du med den meldinga?
– Berre at dette på ein måte var det einaste store i klassisk sjakk som eg ikkje har vunne. No er den samlinga komplett, det er eg veldig fornøgd med, fortel Carlsen.
– Har du rett og slett runda sjakken?
– Ja. Klassisk sjakk i alle fall. Det er klart det er alltid ting ein kan oppnå, men eg har komme så nær å runde spelet som det er mogleg, kjenner eg, fortel Carlsen med eit breitt smil.
– Største sjakkspelaren i verda gjennom tidene
I lista over Carlsens merittar finn ein mellom anna fem VM-gull i klassisk sjakk, fire VM-gull i hurtigsjakk og seks VM-gull lynsjakk.
Sjakkekspert Torstein Bae beskriv sigeren for «ein fantastisk prestasjon».
– Når ein ser på alle triumfane hans, verdscupen, verdsmeisterskap, langsjakk, hurtigsjakk, lynsjakk og så vidare. Det er ikkje lengre nokon annan måte å sjå det på enn at Magnus Carlsen er den største sjakkspelaren i verda gjennom tidene, konkluderer Bae overfor NRK.
Konfrontert med sjakkstjernas utspel om at han har runda den klassiske delen av sjakken, svarar Bae følgjande:
KLAR TALE: Sjakkekspert Torstein Bae er krystallklar på at Magnus Carlsen er den største sjakkspelaren gjennom tidene.
Foto: Lars Bryne / NRK– Det er klart han har runda sjakken på ein måte, han har vunne absolutt alt. Det kunne ein kanskje sagt før dette òg, at han kunne med godt samvit trekkje seg tilbake. Samtidig trur eg han er sugen på å vinne endå meir.
Men kva står att eigentleg å vinne for Lommedalens sjakkess?
– Det eine som han ikkje har vunne er VM i Fischersjakk. Så det er kanskje einaste vi framleis kan seie at står att. Vi håpar det skal bli eit nytt VM til våren. Elles så er det store for Magnus VM i hurtigsjakk og lynsjakk, som har kolossal prestisje, fortel Bae.
Samtidig trur sjakkeksperten at det berre er eit tidsspørsmål før Carlsen, som allereie har sagt at han ikkje vil spele VM i langsjakk, trekkjer seg heilt ut av turneringsformatet.
Overfor NRK stadfestar Carlsen at motivasjonen for langsjakk er liten, men at han ikkje er heilt ferdig med det, heilt endå.
– Eg vil nok først og fremst spele når eg kjenner det er litt spesielle høve. Gjerne om det er sosiale grunnar, litt meir for moro skuld, fortel Carlsen.
