– Championship er ein tøff serie med mange kampar og mange gode lag, og det er ingen dårleg liga å spele i. Men det er heilt klart betre å spele i Premier League, seier landslagssjef Lars Lagerbäck til NRK.
Han tenkjer på landslagskaptein Stefan Johansen, og kan få ønsket sitt oppfylt på Wembley laurdag. Då skal Johansens Fulham møte Aston Villa til kamp om den siste plassen i neste sesongs Premier League.
Playoff-finale i Championship er ofte omtala som verdas dyraste enkeltkamp. Kredittvurderingsfirmaet Deloitte har rekna verdien for vinnaren til minimum 160 millionar pund – over 1,7 milliardar kroner.
Skulle Wembley-vinnaren klare å overleve ein sesong i Premier League, kan verdien bli på nærmare 3 milliardar kroner på grunn av den lukrative tv-avtalen som tek til å gjelde frå sesongstart i 2019.
– Meisterligafinalen mellom Real Madrid og Liverpool er ein større kamp. Men økonomisk er det ein miniputt samanlikna med Wembley-kampen, seier direktør Dan Jones i Deloittes sportsavdeling til BBC.
– Håpar Fulham vinn
HÅPAR PÅ FULHAM: – Championship er ein bra liga, men det er heilt klart betre å spele i Premier League, seier landslagssjef Lars Lagerbäck, og håpar landslagskapteinen er på opprykkslaget
Foto: Terje Pedersen / NTB scanpix– Sjølvsagt håpar eg at Fulham vinn, slik at Stefan kan bli Premier League-spelar, seier Lagerbäck, som sjølvsagt skal sjå kampen laurdag kveld.
– Han er ein spelar som eg har hatt med heile tida, og han er kaptein. Derfor er han ekstra viktig for oss.
Lagerbäck har klar prioriteringslista fror fotballkampane før meisterligafinalen laurdag kveld.
– Eg skal sjå første omgang av Vålerenga–Lillestrøm (klokka 17), men i pausen kjem eg nok til å svitsje over til playoff-finalen (klokka 18). Den kampen skal eg definitivt ha med meg, seier Lagerbäck.
Han har notert seg at Fulham har hatt ein noko spesiell sesong.
– Dei opna dårleg, men så gjekk det fantastisk bra fram til dei siste kampane i serien, med over 20 kampar utan tap. Men så dabba dei litt på slutten, då dei kunne avgjort og gått direkte opp, seier Lagerbäck.
Meiner Johansen har utvikla seg i Fulham
Fulham enda på tredjeplass, to poeng bak Cardiff på siste direkte-opprykksplass.
– Stefan har gjort ein god sesong, og han har også blitt betre på landslaget. Det verkar som om han har hatt godt av å vere i Fulham, seier landslagssjefen. Johansen kom til Fulham i 2016 etter to sesongar i skotske Celtic.
– Han har blitt ein betre spelar, og har ei sentral rolle i laget. I Fulham har han nok ei meir offensiv rolle enn på landslaget, og han har gjort det veldig bra.
– Landslaget spelar ulikt Fulham. Det er Stefans individuelle kvalitetar som spelar som er god, både offensivt og defensivt, seier Lars Lagerbäck.
