Der slo ho fast at det godt kan vere slutt på hinderløp frå hennar sidan.
– Eg slit med hinder, og kjenner at musklane mine er ømfintlege for det start-stopp-løpet som hinderløp er. Eg må nok innsjå at det er 5000 og 10.000 meter som er mine distansar, seier Grøvdal, som skal starte på 5000 meter seinare i meisterskapet.
– No skal eg restituere meg. 5000 passar nok musklane mine betre.
Ho merka frå starten at kroppen og beina var tunge.
– Eg hadde håpa det var litt lettare, men eg kjende frå oppvarminga at beina var tunge, kanskje tyngre enn på treninga. Alt verka tungt, sa Grøvdal til NRK. Tida hennar blei 9.29,41.
Bekymra
VURDERER Å SKIFTE: Karoline Bjerkeli Grøvdal var skuffa og lei seg etter løpet. Ho vurderer å droppe hinderløp og i staden satse på 5000 og 10.000 meter
Foto: Lise Åserud / NTB scanpix– Eg veit ikkje kvifor det er slik. Akkurat no er eg litt bekymra sjølv.
– Vurderte du å bryte?
– Ja, det gjorde eg. Beina var tunge frå start. Eg tenkte på det fleire gonger, men gjorde det ikkje. Det kjendest ikkje rett. Men eg blei litt lei meg og gav litt opp på slutten.
Strekk
Ho fekk ein strekk for eit par veker sidan, men meiner sjølv at det ikkje hemma henne.
– Men det gjekk ei vekes tid utan at eg fekk trene, seier ho. Ho meiner ho har hatt framgang på dei siste treningane, men det har ikkje blitt mange treningsøkter. – Berre nokre tusenmetrar her nede, seier ho.
– Eg veit ikkje kvifor det gjekk slik, eg har sprunge bra på trening, seier Grøvdal, som gjekk til finalen på tid etter å ha blitt nummer seks i sitt forsøksheat fredag. 9.28,84 var nest dårlegast av dei som ikkje tok direkte finaleplass, og 11. beste tid totalt i forsøket.
– Eg kjenner det i magen, men har låge skuldrer, sa ho til NRKs Line Andersen før start.
– Eg går nok litt forsiktig ut, så skal eg kjempe for så god plassering som mogeleg, la ho til.
Hennar personlege rekord og norske rekord er på 9.13,35 frå august i fjor. Årsbeste i år er 9.20,79 frå Diamond League-finalen i Zürich for ein månad sidan. Ho er rangert på 10.-plass på denne distansen før VM.
I meisterskapssamanheng har Grøvdal EM-sølv på 10.000 meter frå 2016 og bronse frå terrengløp-EM i 2015 og 2018. I sistnemnde løp feilrekna ho spurten fordi ho trudde det var ein runde igjen. Trenaren er sikker på at ho hadde tatt gullet utan den reknefeilen.
