I kveld klokka 18 brakar det laus med eit europeisk storoppgjer av dimensjonar i Gdansk. Spania og Italia skal igjen i elden, etter eit nervepirrande semifinalemøte i 2008 då Italia rauk på straffekonken.

• Nett-TV: Sjå Spania–Italia direkte her
• Følg Spania – Italia spark for spark!

Italia har dei siste tiåra vore kjend for eit svært stjernespekka lag. Men etter den elendige innsatsen under VM i Sør-Afrika i 2010 har fleire og fleire stjerner falle frå. Tre tap på rad under treningskampane før meisterskapen, og ein nasjonal kampfiksingskandale har lagt ein dempar på optimismen.

Dette har ført til at laget av mange vert rekna som ein outsider til årets meisterskap, og det er delte meiningar blant ekspertane om dei vil klare å avansere frå gruppespelet.

Men Italia har klart å hevda seg før i kjølvatnet av store kriser, blant anna då dei vann fotball-VM i 2006, så det er framleis dei som trur at Italia kan overraske stort.

Redninga kan vere dei to spissane Mario Balotelli og Antonio Cassano, som kan ha eit overtak på angrepet på Spania.

• LES OGSÅ: Hvor mange kan du navnet på?
• LES OGSÅ: 2008: Verdens tredje beste spiller 2012: Benkesliter

– Eit utruleg spennande angrep

– Dersom dei startar med Cassano og Balotelli på topp så er det eit utruleg spennande angrep. Spania har eit knallgodt lag, men mange av dei har verka slitne dei siste månadene.

Det seier bloggar og ekspert på italiensk fotball, Rune Solenes Opstad til NRK.no, som er ein avmålt optimist på Italia sine vegner.

Men Balotelli og Cassano er kanskje ikkje dei spelarane det går an å stole mest på. Urokråka Balotelli har skapt mange overskrifter i avisene, blant anna har han drapstruga mot dei som kjem med rasistiske utfall i meisterskapen. Cassano har hatt sitt å stri med, då han var i fare for å miste EM grunna hjerteoperasjonen han hadde i samband med eit slag.

Likevel er desse spelarane Italia sitt største håp. Opstad vedgår at laget slit elles.

– Det er klart at Italia slit med spelarar i forsvaret. Og dei gjekk jo på ein smell under generalprøva mot Russland. Men samtidig har dei spelarar i midtbanen og eit angrep som kan hevde seg. Dersom tryggleiken er på plass er det eit lag som er godt rusta til å møte Spania.

Opstad spår at Italia vil kome på ein andreplass i gruppespelet, og dermed vere med i den vidare kampen.

– Italia er eit av 7–8 land som kan gå heilt til topps. Det blir ein utruleg spennande start. Italia møter eit glimrande fotballag, så eg er ein forsiktig optimist.

Spania likevel storfavoritt

Spania klarte å sanke EM-gullet for fire år sidan, då med Fernando Torres i spissen. Men lysluggen frå Madrid har ikkje klart å halde same nivået oppe, og det er ikkje eingong sikkert at han vil kome på banen i dagens kamp mot Italia.

Likevel er det ingen som tvilar på at Spania stiller med eit av dei aller beste laga i meisterskapen, med ein så god stall at toppspelarar som Juan Mata på Chelsea kan måtte ta til takke med benken i kveld.

Ein av dei som er overbevist om Spania-siger er Petter Veland som kommenterer i Canal Plus.

– Eg trur Spania vinn både denne kampen og gruppa si, og at dei kjem til å ha rimeleg få problem på vegen, seier han til NRK.no.

Det at David Villa ikkje er med vedgår Veland er eit stort tap for Spania, men med det høge nivået elles på laget trur han Spania vil ha få problem.

– Det er ein stor smell for Spania at Villa ikkje er med. Det er det største usikre momentet laget har. Når ein fjernar dei måla som han har skåra for det spanske laget ser me kor viktig han har vore. Sjølv om Spania har den beste 23-mannstroppen, så er ikkje Villa ein spelar dei kan erstatte.

Dei som er aktuelle for å steppe inn for Villa er Fernando Torres, David Silva eller Fernando Llorente. Veland trur spanjolane landar på Torres i opningskanten, trass i ein svært dårleg sesong.

Håpar for comeback for Torres

– Det finst enkelte der ute som har eit håp om at dette meisterskapen kan få Torres tilbake i form. Eg er ein av dei. Eg trur Silva speler som kantspelar og Torres blir på topp.

Men på eit område må Veland vedgå at italienarane stiller sterkast. Med premier league-spelaren Mario Balotellig og Antonio Cassano frå Milan som aktuelle spissar, kan det bli farleg.

– Ser ein på enkeltspelarar så har nok Italia-spissane eit høgare toppnivå enn Torres. Men problemet er at dei må gjere meir på eiga hand. Dei får sannsynlegvis ikkje like mange målsjansar som Spania.

Kva er din spådom for oppgjeret mellom Italia og Spania? Kommenter under!