Ruta er om lag 14.500 kilometer lang. Cook hadde eigentleg sett for seg å vere i mål til jul.
Men problema på reisa nordover har hopa seg opp:
- Cook tissa blod og fått konstatert nyrestein.
- Cook og medhjelparane vart rana av ei væpna gruppe.
- Turen vart sett på vent i to veker på grunn av byråkratiske problem i Angola.
- Han har vorte matforgifta fleire gonger.
Likevel held han fram turen. Han er no i Kamerun. I går sprang han 60,5 kilometer.
OPPTUR: Humøret varierer på løpeturen nordover i Afrika. Her jublar han for éin av fotografane som følgjer han nordover.
Foto: Stan Gaskell / @cameramanstan_Omringa av machete-gjeng
NRK har snakka med Stan Gaskell, som jobbar som fotograf på reisa. Han fortel at ekspedisjonen er prøvd rana fleire gonger, og at det i august såg ut til å gå heilt gale.
Dei sleit med å passere ei grense i Kongo, og Cook sprang åleine i jungelen medan støtteapparatet var ein heilt annan stad. Til Good Morning Britain skildrar Cook dette som «den farlegaste dagen i mitt liv».
– Eg kava meg gjennom smale jungelstiar som var fullstendig gjengrodd. Det var heilt kaos, og plutseleg kom eg til ein landsby som openbert ikkje får besøk så ofte, seier Cook.
Då vart det fort veldig oppheta stemning.
– Sjefen for landsbyen kom mot meg og snakka på eit lokalt språk. Han spurde openbert om pengar og vart meir og meir aggressiv. Eg prøvde å overtyde han om at eg ikkje hadde pengar, men etter kvart kom det berre fleire og fleire menneske.
Han følte at heile landsbyen omringa han.
– Det kom fleire med machete, så eg berre rømde til jungelen. Eg har høyrt tilsvarande historier om korleis slikt endar. Korleis skulle eg komme meg ut av dette?
Men Russ Cook rømde til skogs, og fekk til slutt kontakt med støtteapparatet. Tumultane i Kongo føydde seg til i rekkja av nær-døden-opplevingar.
Rana i Angola
Etter to månader på reise og fleire tusen kilometer i beina sat Cook i varebilen og åt lunsj då ei væpna gruppe dukka opp utanfor bilen.
– Ingenting er som å få ein pistol retta mot ansiktet ditt, skriv Cook på Twitter.
– Ingen av oss vart drepne eller såra, dei fekk oss ikkje ut av varebilen. Men vi vart stole frå mykje av utstyret vårt. Eit par kamera, to telefonar, alt vi har av pengar, pass og noko anna, samanfattar Cook på sin eigen Twitter/X-profil.
FORTVILT: Russ Cook avbilda etter hendinga i Angola.
Foto: Stan Gaskell / @cameramanstan_Men sidan den skjeggete briten vil springe heile kontinentet på langs, er det ikkje berre å rømme av garde.
– Vanlegvis når ein reiser inn i utrygge område, kan ein forlate staden på flekken. Vi kan berre bevege oss 60 kilometer om dagen, og stoppar kvar 20 kilometer. Det gjer oss sårbare, seier fotograf Stan Gaskell til NRK.
Draumar om is
Reisa starta i Sør-Afrika i april. Då hadde Cook allereie tenkt på prosjektet i fleire år. Med seg på reisa har han tre medhjelparar, som følgjer han i ein spesialbygd bubil.
– Han hadde ideen for cirka fire år sidan, og har jobba med det sidan, seier fotograf Stan Gaskell til NRK. Han har vore tilsett sidan september i fjor.
Han prøver å springe 60 kilometer om dagen, men stoppar kvar 20 kilometer.
Gaskell og resten av teamet bak legg ut videoar i sosiale medium undervegs. Der blir sjåaren oppdatert på alt frå løpsdistanse, det afrikanske kjøkkenet, dyreliv, tvilsam løpsmote og diverse skavankar.
Akkurat no, i Kamerun, spring han gjennom regnskog i opptil 37 varmegrader.
– Varmt vêr pleidde å vere draumen, men alt eg drøymer om no er å sitje i eit isbad i Antarktis og ete iskrem, seier Cook i ein av videoane.
MILSLUKAR: Russ Cook spring rundt 60 kilometer om dagen, og siktar på å komme i mål i mars.
Foto: Stan Gaskell / @cameramanstan_Matforgifta: Løp 40 kilometer
Så langt har han trassa det meste. Kvar dag blir unnagjort kilometer i ørken, på asfalt, grus og i jungel. Men eit par gonger har den gjennomtrente kroppen protestert.
Etter 26 dagar fekk han magetrøbbel og klarte ikkje å ta til seg næring. Likevel la han bak seg 43,5 kilometer.
– Eg kjende meg som ein zombie, samanfatta han sjølv.
Så vart det gradvis meir alvorleg. Etter å ha tissa blod i fleire dagar måtte han oppsøkje lege.
Då fekk han konstatert nyrestein og fekk streng beskjed om ikkje å springe.
Forbodet vart overhalde i éin dag.
I juli vart ekspedisjonen forseinka i éi veke på grunn av byråkratiske problem. I tillegg har den spesialbygde bilen hatt ei rekkje problem.
I utgangspunktet hadde Cook planlagt målgang i Tunisia i desember.
Han er snart halvvegs, og spring straks inn i Nigeria. Deretter held ferda fram mot Vest-Afrika før han svingar nordaustover til Tunisia. Han skal gjennom fleire usikre område.
– Det har vore fleire hinder på vegen. Det har vore ran, sjukdom og nær-døden-opplevingar som gjer at vi no siktar på målgang i mars 2024, seier fotograf Stan Gaskell til NRK.
