Bolsjunov stussa over Klæbos vurdering – får tydeleg svar

– Eg står trygt ved den avgjerda. Eg var klokkeklar og det står eg for, seier Johannes Høsflot Klæbo til NRK.

Bolsjunov la tidleg skulda på norske utøvarar for at russarane vart «kasta ut» av Noreg og ikkje fekk delta i Drammen og Holmenkollen i starten av mars.

Russlands stjernelag kom til Gardermoen måndag 28. februar, fire dagar etter invasjonen av Ukraina. Same dag vart dei erklærte uønskte av Skiforbundet.

Dagen etter sende Det internasjonale skiforbundet (FIS) ut ei pressemelding. Russiske utøvarar ville ikkje stille til start i Drammen, Holmenkollen eller Falun av «tryggingsomsyn».

Therese Johaug og Johannes Høsflot Klæbo var i forkant av avgjerda tydelege på at dei ikkje ønskte å sjå russiske utøvarar på startstreken.

Det fekk Aleksandr Bolsjunov til å stusse.

– Eg trudde Klæbo ville vurdere situasjonen på edrueleg vis, uttalte russaren til Ivan Dukukins Tiktok-kanal for ein snau månad sidan.

Russiske skuldingar

Bolsjunov ville ikkje sjå bort frå at Klæbo kan ha vorte pressa til å seie det.

Russlands skipresident Jelena Välbe delar tilsynelatande den oppfatninga. Ho meiner meiningane hans sprikar og har peika ut den norske motparten sin, Erik Røste, som arkitekten bak den russiske utkastinga.

Då Johaug uttalte til NRK at ho fann det upassande at russarane fekk delta etter Lahti-renna i slutten av februar, insinuerte Välbe at det var etter instruksjon frå nokon høgare opp i systemet. Det har Johaug avkrefta og Røste avkrefta.

– Desse russiske utspela frå Välbe og enkelte andre oppfattar eg som fleire forsøk på å ta merksemda vekk frå det som er fakta i denne tragiske situasjonen, sa Røste til VG tysdag.

– Eg har ikkje fått med meg så mykje. Det der får dei styre som dei vil, seier Klæbo på spørsmål om den siste månadens skriveri i russisk presse.

Han gjekk onsdag Byåsen inn til NM-sølv på lagsprinten, saman med Martin Julian Buvarp, snautt fem veker etter at han sist gjekk skirenn.

– Definitivt rett

Koronasjukdom gjorde at han mista innspurten i verdscupen i Noreg og Sverige, og dessutan første del av NM i Harstad. I andre del av NM på Lygna, innrømmer han at han har sleppt seg litt nedpå.

Russiske medium opptek lite av tida hans og han ser ingen grunn til at han skulle vurdert situasjonen annleis:

– Vi ser alle no at den avgjerda som vart gjord då dette slo ut definitivt var rett, så får det får vere opp til FIS og dei som skal bestemme seinare kva som skjer. Det at det framleis held på seier sitt.

På spørsmål om korleis han ville behandle nordmannen om dei møttest på startstreken, svarte Bolsjunov at han håpa dei ville konkurrere mot kvarandre.

– Eg håpar situasjonen i verda vil forbetre seg og at alt blir bra.