– Noreg har ikkje mykje damfrosk igjen. Desse tjerna er viktige for framtida til denne frosken, seier seniorrådgivar Gry Gasbjerg Engemyr hos Statsforvaltaren i Agder.
Dei ønsker nå å verne vatna Paddetjern og Iletjern i Arendal kommune for å ta vare på damfrosken.
Trass i omfattande søk er frosken berre funne i desse to små tjerna, og ingen andre stader i Noreg.
Roar Solheim er zoolog ved Universitetet i Agder. Han seier mykje tyder på at damfroskane som finst i Arendal er ein liten restbestand av noko som har vore der sidan det var varmare i Noreg.
– Sidan det er så få av dei er det viktig å bevare dei få stadene og den vesle bestanden som er der, seier Solheim.
Var berre 20 igjen
For seks år sidan var det berre 20 vaksne damfroskar igjen i Noreg.
Situasjonen blei sett på som såpass kritisk at det blei sett i gang ein aksjon for å redde arten frå utrydding.
Da gjekk Dyreparken, Miljødirektoratet, Fylkesmannen og Universitetet i Agder saman om eit avlsprosjekt for damfrosken.
Seks froskar blei henta frå éin av dei tre dammane froskane lever ved og tatt med til Dyreparken i Kristiansand.
Der blei dei sette i ein tilrettelagd avlsstasjon. Målet var at seks froskar skulle bli til fleire.
Dette bar frukter og ein hadde plutseleg 25 småfroskar.
Utbygging er ein trussel
Ifølgje ekspertane er det i hovudsak fisk som er i tjerna der frosken lever, som er problemet for arten.
Zoolog Roar Solheim seier at blant anna vårflaum har ført til at fisk, særleg aure, har kunna svømme inn.
Utbygging og inngrep i naturen er ein annan stor trussel.
– Dersom tjerna blir verna vil det sikre mot utbygging og inngrep som øydelegg naturen rundt, seier Solheim.
- På fem år har Kristiansand bygd ned mest natur i Noreg. Det svarer til 560 fotballbanar.
Er i dialog med grunneigar
Gry Gasbjerg Engemyr hos Statsforvaltaren fortel at tjerna som dei har søkt om å verne i dag ikkje blir brukte til anna enn friluftsliv og turområde.
– Kva konsekvensar vil ei eventuell verning få?
– Da vil det bli naturreservat og det vil bli nokre restriksjonar, men ikkje noko folk vil legge veldig merke til. Det kan for eksempel ikkje byggast ut, seier Engemyr.
Statsforvaltaren har starta ein prosess med grunneigar.
Forslaget er også sendt ut på høyring med frist 10. mai, slik at dei som ynskjer kan komme med innspel.