Litt usikre og forsiktige tok dei seg ut i for første gang.
Det vart bratt læringskurve for den eine tigerungen som våga seg ut på isen inne på tigerområdet.
Ungen gjekk rett gjennom, men klarte greitt å komme seg til land igjen.
– Dei må lære
– Vi hadde hakka vekk isen rundt land i tilfelle dei datt gjennom, slik at det skulle vere greitt å komme seg til land. Dei har jo ikkje bada før. Tigrar er glade i vatn, men dei må jo lære dette, seier dyrepassar Even Grønnerø.
Dei tre tigerungane kom til verda i september i fjor. Totalt vart det fødd fem ungar, men to av dei døydde.
To hannar og ei ho klarte seg fint og fekk dryge fire månader seinare oppleve frisk luft for første gang.
Skal vennast til å vere ute
No veg dei tre tigerungane nesten 20 kilo.
– Dette er noko vi har gleda oss veldig til. Vi har lagt ut litt kjøt rundt omkring i området, slik at dei kan få seg litt godt å ete, seier dyrepassaren.
Sjølv om tigrar toler kulde godt, skal dei vennast gradvis til å vere ute i litt kaldare temperatur.
– I Sibir er dei jo ute i 30-40 minusgrader. Vi skal nok ikkje halde dei ute i mange timar i strekk i starten. Vi må venne dei gradvis til den kalde lufta. Men dei har ikkje problem med å vere ute no, seier han.