Stal fem snøfresarar

– No vert iallefall vareteljinga litt lettare, seier dagleg leiar ved Traktor AS i Lyngdal, Asbjørn Hauan til NRK.no.

Hauan prøvar å vere positiv trass i at verdiar for rundt 150 000 kroner er borte frå traktorforretninga.

Politiet undersøkjer

Tjuvane klipte av ein hengelås og tok seg inn i eit utstillingstelt der snøfresarane stod.

– Det er få spor å sjå etter dei. Politiet vil undersøkje staden i løpet av føremiddagen, seier han.

Hauan har drive butikken i 20 år. Det er 15 år sidan han har vore utsett for eit så alvorleg innbrot.

– Utruleg kjedeleg

– Dette er jo store maskiner så dei må nok ha hatt med seg eit par tilhengarar for å få dei med seg. Det er utruleg kjedeleg å komme på jobb å sjå slikt, seier han.

– Det har komme mykje snø i det siste, så det er nok nokon som har hatt bruk for hjelp til snørydding. No håpar eg politiet finn ut av dette, seier han.