Rettssak etter koffertdrap i august

– Vi er veldig glade for at rettssaka no er fastsett, seier bistandsadvokat Patrick Lundevall-Unger til NRK.

Rettssaka skal i utgangspunktet gå over fem veker.

Det vil bli to dagar i retten kvar veke. Rettssaka kan også bli utvida til fleire veker etter kvart.

– Vil reinvaske seg sjølv

To menn sit på tiltalebenken når rettssaka startar i Berlin i august.

Ein chilensk mann er tiltalt for forsettleg drap, medan ein kamerat er tiltalt for å hjelpt til med å frakte 36-åringen bort i ein koffert.

Ifølgje advokaten har ikkje nokon av dei to tiltalte sagt noko om skuldspørsmålet til no.

– Medtiltalte har sagt at han vil uttale seg i rettssaka for å reinvaske seg sjølv, seier Lundevall-Unger.

• Les: Familien: – Hun var en vidunderlig sjel

Familien reiser til Tyskland

Familien til den drepne 36-åringen skal vere til stades i rettssalen.

Der vil dei få moglegheit til å stille spørsmål til dei to mennene.

Bistandsadvokaten har tidlegare sagt at drapet har vore ei enorm belasting for familien til kvinna.

– Eg ber igjen om at familien får vere i fred, seier han.

Vart funne av eldre ektepar

Det var 13. juni i fjor at Lene Sand vart funne død i ein koffert. Eit eldre ektepar fann kofferten som flaut på ei elv i Berlin.

Den antekne gjerningsmannen, ein 39 år gammal chilensk mann, rømde frå Tyskland. I august i fjor vart han pågripen i Mexico. I mars vart mannen utlevert frå Mexico til Tyskland.

I juni i år vart det også teke ut tiltale mot ein ny mann. Politiet mistenker at han var vitne til drapet. Han er tiltalt for å ha skjult spor og hjelpe til med å dumpe liket i elva Spree.