– Viss du går inn i ein sitkagranskog, så ser du at der er det veldig lite anna som lever, seier naturforvaltar i Lindesnes kommune Lars Berg Holtan.
Han er i det populære turområdet Furulunden i Mandal.
Der har mange sitkagraner nå fått kjent på motorsaga.
For grana, som kan bli over 50 meter høg, er ikkje ønska.
– Sitkagrana er veldig god til å vekse fort, og viss ho får lov til å stå fritt og etablere seg, skygger ho for ein del annan naturleg vegetasjon. Da blir det færre leveområde for det som skal leve, seier Holtan.
- Her kan du lese om korleis Sitkagrana tok over Øya Silda i Nordfjord:
Ein framand art
Sitkagran er ein framand art i Noreg.
Ifølge Wikipedia kjem ho frå vestkysten av USA og Canada. Ho blei innført til Europa på slutten av 1800-talet. Hovudgrunnen var at ho skulle gi hogsttømmer.
Sitkagrana hamna på Furulunden i Mandal då kommunen planta ho der på 60-talet.
Turgåar Geir Sjølingstad har fått med seg utfordringane med sitkagran og er glad for at kommunen tar grep.
– Eg synest det er veldig bra at dei ordnar opp i gamle synder, seier han.
Kjemper mot sitkagran stader i landet
Det har blitt kjempa ein kamp mot sitkagran fleire stader i Noreg.
I 2020 blei det for eksempel fjerna tusenvis på Lista. Trea som i si tid blei planta der for å gi vern mot vêr og vind, blei ein stor trussel mot naturen.
Ifølge Fremmedartslista 2023 er sitkagran vurdert til å «medføre svært høg økologisk risiko som følge av stort invasjonspotensial og stor økologisk effekt».
Der står det også at ho har negative økologiske effektar på ulike naturtypar, og dessutan negativ påverknad på fleire sjeldne og/eller trua artar knytt til det opne kystlandskapet.
– Godt dei ordnar opp i gamle synder
Planen har vore å hogge ned 370 kubikk med sitkagran i Furulunden i Mandal, og dessutan på eit felt på Risøbank.
– Vi høgg ut det vi kan vi og så satsar vi på å få reetablert naturskogane så godt som mogleg, seier Holtan.