– Vi vil sikre ei framtid som framleis sikrar eit reint og rikt hav og eit Skagerrak som er sentralt for næringsgrunnlaget vårt, seier statsforvaltar i Agder Gina Lund.
Statsforvaltaren har teke initiativ til SOS – Saman om Skagerrak, der næringsliv, forsking og styresmakter skal arbeide for å få ein rein og rik kyst på Agder innan 2030.
Ifølgje Statsforvaltaren har Skagerak vorte endra mykje av klimaendringar og annan menneskeskapt påverknad.
Av alle havområda i Noreg, er det i Agder at endringane er størst.
Skagerak skal leve
Satsinga skal leggje til rette for berekraftige løysingar for kystforvaltning i Agder.
Det skal lagast eit sett med kart, verkemiddel og tiltak som sikrar økologisk, sosial og økonomisk berekraftig forvaltning av Agder sine sjøområde.
– Det er viktig at aktørane tek det kunnskapsgrunnlaget som vi legg til rette for, og bruker det fornuftig, seier Jan Atle Knutsen, forskingsleiar ved Havforskingsinstituttet.
Fiskerinæringa er også invitert inn i samarbeidet.
– Vi er jo alltid litt skeptiske til vern som vil påverke aktiviteten vår i havet, men vi vil også ta vare på havet og ha eit friskt og godt hav som vi kan hauste av i lang tid, seier Lennart Danielsen, nestleiar i Sør-Noregs Fiskarlag.
Heiar på slike initiativ
SOS-skagerak vil etablere eit forslag som viser korleis vi kan bevare 30 prosent av sjøområda og restaurere 30 prosent av degradert marin natur.
– Erfaringa mi er at det er så mykje kraft i naturen, at dette sikkert går bra, seier Jan Atle Knutsen, forskingsleiar ved Havforskingsinstituttet.
Denne veka vart konseptet lansert med ein båttur i Lindesnes. Der deltok også klima- og miljøvernministeren.
– Vi skal støtte aktivt om dette. Vi heiar på slike initiativ, seier klima- og miljøvernminister Espen Barth Eide.