Det siste døgnet er det registrert 77 nye smitta i Arendal. Kommunen har aldri opplevd eit så høgt tal på eit døgn tidlegare.
– Det er i hovudsak barn og familiemedlemmer til barna som er smitta, seier ordførar Robert Cornels Nordli til NRK.
Hadde det vore prosentvis like mange smitta i Oslo, ville talet ha vore over 1100 smitta. Det høgste talet som er målt i Oslo på eit døgn er 831.
Også i Bergen er det registert rekordsmitte. 234 personar er smitta det siste døgnet. Det er det høgste talet i løpet av eit døgn i kommunen.
Tysdag vart det registrert 4045 nye koronasmitta i Noreg. Det er 2525 fleire enn førre tysdag.
Massetesting av elevar
Arendal kommune ber no innbyggjarane bruke munnbind i kollektivtrafikken, taxi, butikk, kjøpesenter, eller andre stader det er vanskeleg å halde avstand.
I tillegg blir det lagt opp til massetesting av barn på skulane i kommunen.
– Vi kjem til å teste skuleelevar der det er høgt smittetrykk. Så vi kjem til å teste dei framover. Vi har god testkapasitet og anbefalar folk om å teste seg. Hald deg heime om du er sjuk og ta hurtigtest, seier Nordli.
– Vi følgjer situasjonen veldig tett. Vi vurderer behovet for lokale tiltak fortløpande. Vi har noko trykk på våre helseteneste, men det er handterbart i denne situasjonen, seier Nordli.
Krisemøte i fleire byar
Fleire sørlandsbyar opplever auke i smittetalet. I Grimstad skal kriseleiinga møtast onsdag for å vurdere om dei nasjonale tiltaka er tilstrekkeleg for kommunen. Tysdag var det registert 22 nye smitta.
I Risør vart det registrert 17 nye smittetilfelle tysdag. Det er det høgste talet kommunen har registert på eit døgn. Også her skal kriseleiinga møtest onsdag, for å vurdere innføring av lokale smitteverntiltak.
– No byrjar det totalt å bli mange smitta i kommunen. Både kommuneoverlegen og eg er urolege for utviklinga, seier ordførar Per Kristian Lunden.
Ifølgje Agderposten er 59 personar i isolasjon i Grimstad. Det er oppdaga smitte ved fire skular og to barnehagar i kommunen berre det siste døgnet.
Også i Kristiansand er det auka smitte. Kveldens bystyremøte blir stengt for publikum på grunn av smittesituasjonen. Formannskapet har også vedtatt en anbefaling om at representantene bruker munnbind i møtet.