– Vi snakka om dette allereie i desember at når «The Voice»-sirkuset var over, så ville vi gjere noko saman, seier Pål Rake til NRK.
Resultatet etter eit par dagar i studio vart Beatles-låta «Something».
– Vi vart veldig fascinert av kvarandre sine musikalske evner og stemmer. Vi fall verkeleg for stemmekvaliteten til kvarandre og tenkte at det var noko å byggje vidare på, seier han.
Vurderte 50 låtar
Allereie i desember snakka trioen om å spele inn ei låt saman. Dette var midt under «The Voice» som vart sendt på TV2 gjennom vinteren.
– På kveldane når vi trengde avkopling hang vi ofte saman og snakka om dette. Sjølv om vi var konkurrentar bestemte vi oss for å gjere dette, seier Rake.
Rake, Kvammen og Kristensen laga ei liste over 50 låtar som aktuelle. Til slutt landa dei på Beatles-låta «Something».
– Vi hadde berre råd til to dagar i studio, ler Rake.
– Den første dagen spelte vi Pharell Williams si låt «Happy». Den sat ikkje heilt, men så prøvde vi «Something», og den fungerte veldig bra, seier han.
Bitre konkurrentar
Rake kjenner ikkje til at deltakarar i musikkprogramm på TV tidlegare har gått saman i ettertid.
– Vi hadde lyst til å sende ut eit signal om at sjølv om vi var konkurrentar så kan vi jobbe saman etterpå. Vi tykkjer det er fint å kunne vise at vi ikkje er så bitre konkurrentar som vi framstod på tv, seier han.
- Les også: Platedebutant valgte vinyl
Han understrekar samstundes at alle tre også satsar vidare på ei solokarriere.
– Vi har våre solokarrierer som vi jobbar parallelt med, seier han.