Fjerna ulovlege skilt: – Dette blir ikkje populært

Kommunetilsette har allereie starta arbeidet med å ta vekk slike skilt i Kristiansand..

– Dette blir ikkje populært, det er heilt sikkert.

Fagarbeidar i ingeniørvesenet i Kristiansand kommune, Kjell Åsan, var torsdag ein av mange som vandra i brøytekanten på jakt etter heimesnikra skilt.

Ulovleg skilting

Den siste tida har fleire sett opp skilt på offentlege parkeringsplassar som dei har måka sjølve.

Kommuna meiner det både er ulovleg og frekt.

Produksjonssjef i ingeniørvesenet, Glen Allan Eikeland, har forståelse for at folk gjer det, men seier det er ulovleg.

– Eg kan forstå at dei som har måka plassen tykkjer det er trist viss nokon tek den, men no er det ein gong slik at det er offentleg parkering. Det er ikkje lovleg, alle skilt som blir satt opp langs offentleg veg skal vere offentleg skilta.

• Les også: Masse snø, blankpolerte veier – og det blir verre

Gratis underhaldning

Men ordninga med heimesnikra skilt er langt fra ny. Henry Pedersen har sidan 60-talet sett skilt som dukkar opp i brøytekanten når vinteren kjem.

– Allereie den gongen var det dei som praktiserte å skuffe seg ut ein plass og setje opp skilt.

Marit Aasgård seier ho ofte opplever naboar som kranglar om måkte parkeringsplassar.

– Det er gratis underhaldning i kjøkkenvindauget kvar dag når snøen fell.

Fryktar konsekvensar

Aasgård har forståelse for at folk blir frustrerte når andre tek plassen dei har måka.

– Når folk står å grev ut ein parkeringsplass i to timar, for så at ein nabo som ikkje gidd å gjere det kjem å tek den før dei kjem heim frå jobb, så forstår eg at dei blir irritert.

Kjell Åsan i kommuna fryktar ein konsekvens av at dei fjernar skilta kan vere at folk parkerar uforsvarleg.

– No blir det berre endå dårlegare å parkere, så gidd ikkje folk å skuffe og då parkerar dei berre endå lenger ut i vegen.

• Les også: Slik unngår du parkeringsbot i snødekte gater