– Slangen vart funne i ein tøypose, seier vaktsjef i Tollvesenet, Ellinor Vedal til NRK.
Det var under ein rutinekontroll på hamna i Kristiansand at slangen vart funne.
I bilen var det tre unge menn. Ein av dei, ein 21-åring, innrømte at han hadde henta den i Danmark.
Ellinor Vedal er vaktsjef hos Tollvesenet i Kristiansand.
Foto: Sander Heggheim/NRK– Han fortalde at han hadde kjøpt den i Danmark, der det er lovleg, seier Vedal.
21-åringen er meld til politiet.
Mattilsynet avgjer skjebnen
– Den er ulovleg innført. Ofte vert slike dyr avliva, seier vaktsjefen hos Tollvesenet, som ikkje tykkjer det er særleg artig å beslaglegge slangar.
– Det er ikkje akkurat det beste vi veit. Med jamne mellomrom finn vi dyr i våre kontrollar. Alt frå fuglar, på merkverdige plassar, til krypdyr. Som oftast er det snakk om hundar, seier Vedal.
Det er no opp til Mattilsynet å avgjere kva som skal skje med kvelarslangen.
NRK har forsøkt å komme i kontakt med nokon som kan svare på det, utan å lukkast.
Boaslangar er ikkje giftige, men drep byttet ved å slynge seg om det.
Må seie nei til slangar
I april i fjor vart det funne ein 2,5 meter lang tigerpyton under ransaking av eit hus i Kvinesdal.
Den tok Kristiansand Dyrepark hand om. Men ofte må dei seie nei.
– Vi får mange spørsmål om å ta imot slangar frå beslag over heile Norge, nokre gonger kvar einaste veke. I løpet av eit år må vi særs ofte seie nei, sa veterinær i Dyreparken, Rolf-Arne Ølberg til NRK i april i fjor.
Mattilsynet har gjennom fleire år teke til ordet for å oppheva forbodet mot fleire dyreartar.
– Forbodet vi har i dag blir ikkje respektert, og er vanskeleg å handheve. Då meiner vi det er betre for dyrevelferda å gjere hald av enkelte dyr lovleg, sa sjef i seksjon for dyrevelferd i Mattilsynet, Torunn Knævelsrud i fjor.
