– Vi får sikkert nye røykvarslarar innan kvelden er omme, seier Kristine Dahl Danielsen.
Ho og familien har besøk av brannvesenet. Dei sjekkar om alt er i orden med røykvarslarane i huset.
Røykvarslarane til familien har gått ut på dato. På dei står det at dei skal bytast i 2022.
– Eg er veldig glad for at dette vart oppdaga, for eg var faktisk ikkje klar over det, seier Carl Steven Dahl Danielsen.
1. desember er røykvarslarens dag. Brannvesenet ønskjer at folk skal sjekke utløpsdatoen.
Foto: Caroline Utti / NRK
Varar i ti år
Kvart år døyr rundt 40 nordmenn i brannar. Mange av dei kunne vore redda av røykvarslar.
Dei fleste har røykvarslarar, men det kan vere ein falsk tryggleik.
1. desember er røykvarslarens dag. I år ønskjer brannvesenet at vi ikkje berre skal byte batteria, men vi må og sjekke at røykvarslaren ikkje har gått ut på dato.
– Røykvarslarar varar som regel i ti år før dei må bytast, fortel Fred-Michael Simonsen, brannførebyggjar i Kristiansandsregionen brann og redning IKS.
Elektronikken i røykvarslarar ringast over tid. I tillegg kan evna til å oppfatte røyk bli redusert som følgje av at støv og smuss samlar seg opp i løpet av åra.
– Viss dei verkar så er du jo heldig, men ein kan risikere at dei ikkje verkar når dei faktisk skal. Det kan vere fatalt, seier Simonsen.
Veit du når røkvarslaren din går ut på dato?
Påbode
Røykvarslaren vart påboden i norske heimar i 1990.
Alle bustader skal ha røykvarslarar eller brannalarmanlegg og du må ha minst éin varslar i kvar etasje.
– Slik eg ser det, er det å vere i ein bustad utan fungerande røykvarslar, som å køyre bil utan bilbelte, seier Rolf Søtorp, administrerande direktør i Brannvernforeningen i ei pressemelding.
Alarmen skal kunne høyrast tydeleg på opphaldsrom og soverom, også når døra mellom romma er lukka.
