– Eg er veldig glad. Men eg veit at det ikkje er nokon garanti for at eg får komme tilbake til Norge, seier Muradi til NRK.
Ba om ny vurdering
Onsdag ettermiddag kom statsminister Erna Solberg om meldinga han hadde håpa på.
Statsministeren vil altså be om ei ny vurdering på om Muradi skal få behandla asylsøknaden sin i Norge.
Solberg vil be justisministeren gå gjennom praksis kring bruk av Dublin-ordninga ved behandling av asylsøknader frå personar som tidlegare har hatt eit tilsettingsforhold til norske styrkjer i Afghanistan.
Muradi vart henta av politiet i Mandal natt til tysdag og send til Italia.
Natt til onsdag gjekk han gatelangs og svolten utanfor flyplassen i Roma.
– Eg har verken pengar eller tak over hovudet. Det har vore ei kald natt, sa han til NRK tidlegare onsdag.
Onsdag kveld er han i den italienske byen Lecce der han skal søkje asyl torsdag.
Takkar for støtta frå det norske folk
Han har også fått med seg at han har massiv støtte frå det norske folk.
– Eg venta ikkje ei så omfattande støtte frå det norske folk. Det einaste eg kan gjere er å seie takk for all støtta, seier han.
Han fortel til NRK.no at han får sove hos ein ven av ein ven denne natta.
– Det er berre for i natt, så eg håpar styresmaktene her gir meg ein stad å vere i morgon, seier han.
Muradi vedgår at han har det tøft.
– Eg er emosjonelt veldig langt nede. Eg har berre lyst til å gråte. Men eg er sjølvsagt glad for at dei vil ta ei ny vurdering, seier han.
Kjempa for Norge
22-åringen måtte flykte frå Afghanistan etter å ha vore kamptolk for norske styrkjer etter frykt for represalier frå Taliban.
Muradi flykta til Italia før han seinare kom til Norge. Norske styresmakter har argumentert med at det er Italia som skal behandle asylsøknaden hans fordi det var der han kom først.