Sogndal vakna og vann på heimebane

Kristian Fardal Opseth redda tre poeng til Sogndal. Men eit heimelag i opningsdvale heldt på øydeleggja poengfangsten på Fosshaugane.

Kristian Fardal Opseth

HERJA: Kristian Fardal Opseth leika seg på heimebane med Hønefoss.

Foto: Heidi Lise Bakke / NRK

Endå ein gong sov Sogndal då dommaren bles kampen i gang. Men i motsetnad til i opningskampen mot Bærum, blei dei straffa i 1. divisjonskampen mot Hønefoss på Fosshaugane i kveld.

Sogndal dunka til på heimebane

JUBEL: Sogndal hadde all grunn til å vere fornøgde med siger på heimebane.

Foto: Heidi Lise Bakke / NRK

Dominerte 1. omgang

Gjestene nytta seg raskt av den tafatte opninga til heimelaget. Etter fem minuttar skaut Hønefoss’ Morten Hæstad rett på lagkamerat Miguel Hamutenya, som styrte ballen i mål. 1–0 til Hønefoss.

Etter skåringa vakna Sogndal frå opningsdvalen, tok styringa på kampen og skapte fleire store sjansar. Men eit fysisk sterkt Hønefoss-mannskap – med Ugonna Anyora i front – rydda unna, og heimelaget måtte gå av bana etter fyrste omgang eitt mål under.

Fardal Opseth opna kontoen

Sogndal byrja den andre omgangen med å halda fram dominansen i banespelet, men heimelaget kom ikkje til store sjansar før i det 53. minuttet.

Keeper Lukasz Jarosinski

SEIGT: Keeper Lukasz Jarosinski måtte hente ballen ut av nettmaskene to gongar i løpet av kampen mot Sogndal.

Foto: Heidi Lise Bakke / NRK

Då skåra Sogndal ut av ingenting. Ei hønefossklarering gjekk i ein sogndalspelar og vidare til Kristian Fardal Opseth. Han snudde seg på ein femøring og skaut rett over hovudet til hønefosskeeper Lukasz Jarosinski som ikkje makta å få opp hendene. 1–1.

53-metersskåring

Så – etter 72 minuttar skjedde det som berre sjeldan skjer i ein fotballkamp. Sogndalkaptein Rune Bolseth vann ballen frå hønefosskjempa Anyora. Ballen trilla til Fardal Opseth, som stod midt på den 105 meter lange Fosshaugane-bana. I det han dunka ballen oppover, uffa publikum seg og fatta ikkje kva sogndalspissen heldt på med. Men ballen susa over hønefosskeeperen og i nota. 2–1 til Sogndal.

Hønefoss i leiing på Fosshaugane

KJEMPA SEG TILBAKE: Sogndal vart tekne på senga i første omgang. Etter kvart vakna laget. Skikkeleg.

Foto: Heidi Lise Bakke / NRK

Dei siste ti minuttane av kampen flytta Hønefoss fram luftskytset sitt, men sogndalforsvaret fekk rydda unna og sikra med det tre viktige poeng og ein andreplass på 1. divisjonstabellen.

Atle Steinar Solheim vart overraska med nyheita om at han er ein av fem nominerte
Over 80 barn var samla på Jølstraholmen for å tjuvstarte adventstida med pynting av pepperkakehus.
Å levera lekser på nett er ikkje lett når internett-tilgangen er dårleg. 
Men det ER realiteten for mange skuleelevar i distrikta. 
Skilnadane er store, trass i at bruk av data får ein stadig større plass i skulen.