Ellingvåg var ei av mange som aksjonerte og lenka seg fast i Vevring for to år sidan då prøveboringane starta. Ho utelukkar ikkje framtidige aksjonar.
– No er det fleire saker eg heller ville brukt tida mi på enn å bryte lova. Samstundes ser eg det som ein moglegheit til å komme tilbake til Vevring, så lenkene er klare dei om det skulle gå så langt, seier ho.
Meiner fjorden blir ofra
Tale Hammerø Ellingvåg i Rød Ungdom seier dei har hatt tru på Venstre sidan dei profilerer seg som eit miljøparti.
– Men det held ikkje med berre å vere grøn i valkampen. Det er ikkje for seint å stoppe denne saka, for selskapet har ikkje fått konsesjon til drift, seier ho.
Får støtte i Unge Venstre
Sjølv om ikkje ho får med seg dei godt vaksne i Venstre i kampen mot deponi, får ho støtte i Unge Venstre.
– Venstre har føreslege fleire gonger at dette må stoppast, men dessverre har vi eit gigantisk stortingsfleirtal som er mot å stoppe fjorddeponiet, seier leiar Sondre Hansmark i Unge Venstre.
– Alvorleg at Venstre har snudd
Heller ikkje SV er nøgd med Venstre som seier at gruveprosjektet i Naustdal skal gå sin gang.
– Eg trur Venstre eigentleg er einig med SV om at dette er dumt, men så viser regjeringserklæringa at Venstre ikkje klarer å få gjennom politikk og blir overkøyrd av Frp gong på gong, seier stortingsrepresentant Nicholas Wilkinson (SV).
I dag gjekk han på talarstolen i Stortinget for å fremje forslag om å stoppe fjorddeponiet.
Wilkinson meiner Venstre har blitt lurt i denne saka.
– Dette viser korleis H og Frp har lurt Venstre. Det finns ikkje ein einaste søknad om nye sjødeponi i heile Norge.
Venstre: Nøgde med Jeløya-plattforma
I ein e-post til NRK skriv statssekretær Atle Hamar (V) i Klima- og miljødepartementet at Nordic Mining fekk løyve etter forureiningsliva til å utvinne mineralet rutil frå Engebøfjellet i Naustdal i juni 2015 og at dette vedtaket gjeld framleis.
– Miljøverknadane av gruveverksemda blei svært grundig vurdert etter forureiningslova og vurdert som miljømessig akseptable da løyvet blei gitt. Det er stilt strenge krav til overvaking og drifta vil bli nøye følgt opp av Miljødirektoratet. Det er ikkje gitt løyve til å bruke kjemikalie som inneheld miljøgifter. Vi er nøgde med at Jeløya-plattforma seier at det ikkje skal bli gitt nye utsleppsløyve til sjødeponi for gruveavfall i denne perioden.
- Les også:
- Les også: