– Eg er veldig godt nøgd. Eg gjekk inn i turneringa med null forventningar og enda opp med ein fjerdeplass, seier Fardal til NRK.
I helga vart det første noregsmeisterskapen i poker på norsk jord arrangert. Tidlegare har det vore forbod mot organisert poker i Norge og NM har då blitt arrangert i utlandet.
– Det var god stemning og folk var veldig nøgd med at vi no får lov til å spele NM i Norge, seier Fardal.
- Les også:
Lite i det siste
Fardal vart hekta på poker for elleve-tolv år sidan, og spelte veldig mykje i nokre år før han trappa ned og fokuserte på studium.
– Eg har nesten ikkje spelt poker dei siste åra, men då denne sjansen dukka opp vart eg med, seier Fardal.
Nesten 2000 spelarar betalte dei 5000 kronene det kosta å kjøpe seg inn på NM.
– Når skjønte du at det kunne gå mot ei topplassering?
– Då eg kom inn på dag tre og det var rett over 100 igjen skjønte eg at det kunne bli bra, fortel Fardal.
30-åringen har vore med i NM før. I 2006 under NM i Sverige rauk han ut under første dag.
Spelte mot verdsstjerne
På fjerde og siste dag under NM var det elleve som sat igjen på finalebordet – ein av dei var Felix Stephensen som i fjor vart nummer to i poker-VM i Las Vegas.
– Han er utruleg dyktig. Det er viktig for poker i Norge at folk ser at det er eit spel der ein treng ferdigheiter og ikkje berre flaks. At han kjem på andreplass i VM og så vinn NM er ikkje tilfeldig, seier Fardal.
Fardal forklarar at for å lukkast i poker må ein sjølvsagt ha ein del flaks, men ein må spele smart og satse riktig for å vinna. Han kom inn på siste dagen under poker-NM som den med minst pengar på hand, men spelte seg opp til ein fjerdeplass.
Stephensen som vann turneringa fekk 1,4 millionar kroner for innsatsen.
- Les også:
Oppussing
Fardal bur for tida i Oslo der han jobbar som prosjektleiar på eigedomsavdelinga til Høgskulen i Oslo og Akershus.
Med fjerdeplassen i turneringa sikra Fardal seg 384.240 skattefrie kroner.
– Eg skal pussa opp leilegheita mi, så dei pengane kjem godt med der, svarar Fardal på spørsmål om korleis han skal bruka gevinsten.
– Fjerdeplass i comebacket på pokerbordet, blir du å sjå i fleire turneringar framover?
– Eg kjem ikkje til å reise rundt på turneringar, men skjer det noko i nærleiken hiv eg meg kanskje med, seier han.