Kystvegen kan vere eitt steg nærare

Denne veka kom det som kan bli ei gladmelding for innbyggjarane langs kysten. Frp, Høgre, Venstre og KrF på Stortinget skriv i sin merknad til oppgåvemeldinga: «Større vegar med sterke næringsinteresser kan vurderast overført til staten».

Flora-ordførar, og styreleiar for prosjektet, Bengt Solheim-Olsen (H) er optimistisk.

• Les også: Kystjubel for ferjeavløysingsmidlar

– Det er eigentleg midt i blinken, for tankegangen og behovet er for ein samanhengande veg langs kysten av Sogn og Fjordane, seier han.

– Veldig spennande

Høgre-ordføraren har ivra for ei opprusting av det som blir kalla Kystvegen mellom Ålesund og Bergen. Særskild biten mellom Florø og Måløy. Og no kan den stå for tur.

• Les også: Statssekretær avviser å byte flyplassar mot betre veg

Bjørn Lødemel (H) sit i kommunalkomiteen som handsama meldinga. Han tykkjer det er veldig spennande og at Kystvegen er eit prosjekt som bør overtakast av staten.

• Les også: Trur E39-avgjerd opnar opp for kystvegen

– Det er ein viktig veg som går gjennom tre fylke og er ein næringsveg på alle måtar. Allereie i 2013 skreiv vi ein merknad til Nasjonal Transportplan at ein burde vurdere Kystvegen over på statleg ansvar, seier han.

Gir større sjanse

Solheim-Olsen seier det ikkje er endeleg bestemt om dei vil ha statleg veg, men vedgår at dei heller meir og meir i retning av det. Spesielt med omsyn til å få realisert delar av vegen så raskt som råd.

• Les også: Lovar ferjeavløysingsmidlar i 40 år

– Signala som kjem frå fylkeskommunen er at investeringsmoglegheitene er relativt små i eit 10-20-års perspektiv, seier han.

– Kvifor skal staten eventuelt bruke pengar på ein parallell til sin eigen E39.

– No går den relativt langt inne i landet. Det har skapt eit umiddelbart behov for å få fortgang i ein samanhengande veg langs kysten mellom Ålesund og Bergen.