– Hjorten er definitivt ein «klimavinnar» som kjem godt ut av det milde vêret. Mellom anna fordi maten blir lettare tilgjengeleg.
Johan Trygve Solheim ved Norsk Hjortesenter i Svanøy seier hjorten er blant dyra som nyt godt av den milde vinteren me no har i store delar av landet.
Vintrar med høg temperatur gir også godt grunnlag for mindre ettertrakta artar. Om den milde vinteren held fram vil ein truleg sjå meir til både flått og brunsnigel.
Sjølv om hjorten i sum kjem godt ut, byr temperaturane også på utfordringar.
– Det er også positivt for ein del parasittar, som me er vane med om sommaren, som no også overlever vinteren, som kan skape sjukdom hjå hjorten.
Vinterfuglane blir påverka
Den milde vinteren har gjort tydelege utslag for småfuglane.
– Det er mykje bjørkefinkar på vår fôringsplass, seier Morten Haugum.
Saman med kona Heidi Vatsø er han lidenskapeleg oppteken av å observere fuglar. Denne helga skal dei saman med fleire tusen andre telje småfugl for å sjå endringane frå tidlegare år.
Andre fuglar blir det færre av over tid.
– Det gjeld meisene. Dei er framleis vanlege, men det blir færre per fôringsplass, seier Frode Falkenberg. Han er rådgjevar og ornitolog i Norsk Ornitologisk Forening.
Grønfinken er ein annan sporvefugl det blir færre av.
– Vi er spent på om dei kjem seg tilbake til normalnivået.
Meir hjort i aust og nord
Solheim seier at det milde klimaet gjer at bestandane aukar, samstundes som hjorten spreier seg utover i landet.
– Færre snørike vintrar i store delar av landet gjer at hjorten spreier seg aust- og nordover. No er det hjort i store delar av sør-Noreg, men også aust for Glomma og nordover til Lofoten. Det er ganske imponerande når ein tenkjer på korleis det var for berre 30–40 år sidan.
Uheldig for elg og rein
Det er likevel ikkje alle hjortedyr som har like stor grunn til å takke mildvêret.
– Elgen er betre tilpassa eit kaldare klima med snørike vintrar. Den er fysisk større og handterer betre store snømengder, der den då fekk eit konkurransefortrinn på hjorten, fortel Solheim.
– No ser ein at elgen mister dette fortrinnet, samstundes som at parasittar råkar elgen hardare.
Han meiner me bør ta til oss endringane som skjer når bestanden av hjort aukar.
– Det vil gjere oss betre i stand til å forvalte den fantastiske ressursen som hjorten er. Både når det kjem til å regulere talet på dyr, men også kvaliteten på dyra.