Det er allereie bestemt at den nye traseen for E39 skal bli lagt om Stryn i framtida. Men det er langt fram. Og i mellomtida fryktar både politikarar og innbyggjarane gamlevegen skal bli gløymt.
Delar av vegen mellom Byrkjelo og Sandane held same standard som for hundre år sidan.
– Problemet er at dette vil vere E39 i mange år framover. Her må det raskt komme tiltak på dei verste flaskehalsane, seier Alfred Bjørlo, ordførar i Eid.
(Artikkelen held fram under biletet.)
Samferdselsminister Kjetil Solvik Olsen (Frp) køyrer no Vestlandet frå nord til sør for å lytte til folket. Anniken Rygg (H) seier innbyggjarane i Nordfjord ikkje kan vente til den nye vegen står klar.
– Dette skal vere E39 heilt til den nye traseen står ferdig. Eg trur vi snakkar ti år før det skjer, seier ho.
– Vi fryktar at dette skal bli den gløymde vegen.
Statsråden er einig i at vegen burde bli betre, men kan ikkje love noko.
– Vi jobbar for å sjå kva vi kan framskunde av ulike vegprosjekt, her er det viktige at vi får planlagt strekningar. Og så blir det å sjå fram mot den neste Nasjonale transportplan, som vi jobbar med no.