Barnas Plattform er eit av kurstilboda som aukar i popularitet. Frå april av vert det landsdekkande med kurshaldarar i kvart fylke. Eit søk på internett syner at det også er fleire andre som tilbyr liknande kurs og opplegg.
– Vi har ein grunntanke om at vi skal ha glade, sterke og trygge born. I min jobb som lærar, har eg sett at det blir fleire og fleire born som slit med dårleg sjølvkjensle, fortel ein av kurshaldarane for Barnas Plattform, Sølvi-Ann Hove.
Les også:
Betalar for å bruke dei rette orda
I Bygstad i Sogn og Fjordane, er Sølvi-Ann Hove kurshaldar for 6 frammøtte foreldre. På kurset fortel Hove om fire verkty som foreldra skal bruke heime for at borna skal få eit god sjølvkjensle og sjølvtillit.
– Eit av verktya skal brukast kring middagsbordet. Vi skal stille dei rette orda for å få fram det positive som skjer i kvardagen. Vi spør ofte om korleis dagen var, men ikkje om kva som har vore bra.
Eit kurs hjå Barnas Plattform tek to timar og kostar nær 800 kr. Foreldra vert fulgt opp av kurshaldaren etter endt kurs.
På kurset i Bygstad deltek mor og førskulelærar Turid Rørgård. Ho tykkjer dette er noko alle burde få med seg.
– Dette opna augene mine, og er eit kurs alle burde hatt.
Les også:
Starta med mental trening av vaksne
Birgit Semundseth hevdar sjølv at ho er lisensiert mental trenar, og starta Barnas Plattform i 2010.
– Først jobba eg med vaksne, og såg at deira utfordringar ofte var knytt mot manglande sjølvtillit og sjølvkjensle.
Fleire meinte at dette burde dei visst som små.
– I staden for å reparere vaksne, så vil eg jobbe for å få på plass ein plattform hjå borna, for at dei skal verte trygge og sterke som vaksne, fortel Semundseth.
– Kurs er ikkje løysinga
– I utgangspunktet er det ikkje nødvendig med slike kurs. Dagens foreldre er stort sett veldig dyktige til å ta vare på ungane sine gjennom dei ordningane som allereie eksisterer, meiner generalsekretær i Rådet for psykisk helse, Tove Gundersen.
Kring 15 til 20 prosent av alle born mellom 3 og 18 år har psykiske vanskar, syner den siste folkehelserapporten.
– Desse kursa vert etablert fordi det er ein del born og unge som slit, og sjølvsagt vil det kunne hjelpe, men det er nødvendigvis ikkje kurs som er løysinga på det, seier Gundersen.
Les også:
Hevdar at det hjelper
Semundseth meiner tilbakemeldingane frå foreldra, seier sitt.
– Eg forstår at Rådet for psykisk helse ikkje kan følgje med på kvaliteten og effekten av alle kurs som vert tilbydd, men eg er glad for å høyre at Tove Gundersen anerkjenner at kurs kan hjelpe, då det er noko vi tydleg høyrer frå foreldre som har deltatt.
– Rådet for psykisk helse har eit mykje større perspektiv enn Barnas Plattform. Vårt bidrag handlar om enkle verkty for å betre og oppretthalde bornas sjølvtillit og sjølvkjensle, meiner Semundseth.
Les også: