Flyktningar mista alt i brann: – Veslesøstera mi trudde det var krig igjen

– Eg høyrde søskena mine som skreik. Då vi kom ut av huset såg vi at det brann kraftig på taket. Veslesøstera mi trudde det var krig, seier Hiba Almobarak.

Ho budde saman med familien sin i ei av leilegheitene i ein kommunal fleirmannsbustad som tok til å brenne torsdag kveld. Familien med åtte born i alderen seks til 21 år mista heimen sin i brannen.

Almobarak og familien kom til Noreg frå Syria for to år sidan. Nok ein gong står familien utan noko.

– Vi har mista alt. Vi har berre kleda vi går i og familien vår. No har eg same følelse som då vi flykta til Tyrkia frå Syria, seier ho.

Blei redda av nabo

Det budde både familiar med born, einslege og par i det kommunale leilegheitskomplekset som husa flyktningar.

– Naboen vår redda oss. Han gjekk ikkje før alle i familien var ute av huset. Kjærasten til naboen vår tok med seg alle borna til huset sitt og gav dei mat og drikke. Dei var veldig snille med oss, seier Almobarak.

Det er sju leilegheiter i den kommunale fleirmannsbustaden. Minst to av leilegheitene er totalskadde. I den eine budde ein einsleg person. I den andre budde familien frå Syria.

– Det er traumatisk for dei involverte. Dei tenker mykje på kva som i verste fall kunne skjedd om ikkje alle kom seg ut, seier Hanne Bisgaard i Nav i Luster.

Luster kommune jobbar med å skaffe nye bustadar til familiane. Lokalsamfunnet slår no ring rundt dei som blei råka av brannen.

– Vi har allereie fått mange telefonar frå folk i Luster som vil hjelpe. Det er mange som vil stille opp, seier Bisgaard.