Kystvaktskipet kom seint søndag kveld til Lustrafjorden. Då dagslyset la seg over Indre Sogn starta dei arbeidet med å rydde etter flaumen i går.
– Det er så langt mest tre og større greiner som er til fare for anna trafikk. Men vi er heldige med både vêr og straumforhold. Det meste driv innover fjorden, og ikkje ut i Sognefjorden, seier skipssjef Lars Andre Johansen.
Måndag ettermiddag måtte dei også prioritere å plukke opp rundballar frå fjorden. I Luster reiste 500 rundballar med flaumen.
Mange dagar til rydding
Ingen personar vart skadde då store nedbørsmengder og kraftig snøsmelting gjorde at både Fortundalselva og Floane i Mørkridsdalen gjekk langt over breiddene sine. Totalt vart eit 30-tals personar evakuerte og like mange isolerte i dei to dalane i Luster.
- Les også: Vemodig å sjå så store skader
Naturkreftene gjorde stor skade. Førebels er det ukjent kor mykje skade, men både vegar og vegetasjon har fått gjennomgå. Kor mykje som har nådd fjorden er uvisst.
– Eg vil tru at det går mange dagar med rydding her. I høve til at vi berre har rydda ei nautisk mil av ein fjord på 15 nautiske mil, så tykkjer eg vi har tatt unna mykje, seier Johansen.
«Utvær» på veg
I utgangspunktet blir kystvaktskipet i området til Kystverket får på plass sine båtar. Dei vil ha to båtar på plass i dag, medan ein tredje båt kjem tysdag.
Kystverket vil i dag opp med helikopter for å få oversikt. I tillegg er fartøya «OV Utvær», «Storholmen» og «Slåtterøy» på veg for å hjelpe.
– «Utvær» er den største typen vi har, og med to tilsynsbåtar i tillegg så har vi bra kapasitet og effektive båtar til slikt arbeid, seier seniorrådgjevar Pål Are Lilleheien.
– Det er førebels tidleg å seie, men mykje tyder på at ryddearbeidet vil ta tid. Det er betydeleg mengde drivgods, legg han til.