– Det er utruleg kjekt, og det var ein slitesiger for oss, seier Kjerstin Boge Solås til NRK.
Etter kampane onsdag tar laga i eliteserien no VM- og juleferie fram til 3. januar. I sigeren mot Vipers noterte 17-åringen frå Dale i Sunnfjord seg for tre scoringar. Tertnes toppar tabellen med 15 poeng på ni kampar, det er poenget framfor Glassverket og Larvik. Larvik har blitt trekt tre poeng grunna dårleg økonomi.
Rett til Ungarn
At det er opphald i seriespelet til over nyttår betyr ikkje at Boge Solås får ferie av den grunn.
– Måndag reiser eg på samling med juniorlandslaget i Ungarn, og den varar fram til fredag, seier Boge Solås.
- Les også:
- Les også:
Når ho kjem heim att er det få dagar til VM for senior byrjar. Der skal lagvenninne Stine Skogrand spele.
– Det blir ekstra kjekt å sjå på VM no når ho er med, fortel 17-åringen.
Etter å ha budd i Bergen dei siste månadane, skal ho feira jul med familien heime i Dale.
– Eg ventar på ho eg
Tertnes-kaptein og VM-uttatte Stine Skogrand er mektig imponert over korleis 17-åringen har tatt nivået på elitenivå.
– Eg gløymer ofte at ho berre er 17 år. Ho spelar og opptrer mykje eldre enn det, seier Skogrand til NRK.
– Hadde ein slike forventningar til ho då ho kom til klubben?
– Absolutt ikkje. Ho er 17 år og kom rett frå 2. divisjon. Då kan ein ikkje ha slike forventningar, og ho veks i kvar einaste kamp, seier Skogrand.
- Les også:
Skogrand er tatt ut i VM troppen som skal representere Norge under VM i Danmark frå 5.–20. desember.
– Trur du Kjerstin har det som skal til for å bli tatt ut på landslaget i framtida?
– Ja, eg ventar på ho eg, seier Skogrand og smiler bredt.
Utvikla angrepsspelet
Boge Solås vart henta til Tertnes før sesongen av Tertnes-trenar Tore Johannessen. Han kjenner ho godt frå før, gjennom sin jobb som trenar for juniorlandslaget, der Boge Solås har vore med.
– Ho gjer meir på elitenivå enn det ho gjorde som 2. divisjonsspelar. Eg var sikker på at ho kom til å bidra for oss med ein gong i forsvarsspelet, men eg er veldig imponert over korleis ho har utvikla angrepsspelet sitt, seier Johannessen.
– Kor stort er potensialet hennar?
– Ho har ingen avgrensingar i spelet sitt. Ho er ein tovegsspelar som kan bli verdifull for andre enn juniorlandslaget på sikt, svarar Johannessen.
Boge Solås vart blant anna lagets toppscorar med fem scoringar i 35–21-tapet mot Larvik i semifinalen i cupen.