«Får du hovudpine av pipelyd? Då er dessverre ikkje dette bilen for deg.»

Knirke- og klunkelydar, autopilot og cruisekontroll som lever sitt eige liv, vatn i lykter som lyser dårleg, vanskeleg å starte, sliten lakk og eit varmeapparat som slår seg av og på når det sjølv passar seg.

I eit forsøk på å selje bilen sin på finn.no, er den bilinteresserte elektromontøren svært så ærleg om tilstanden på Teslaen han kjøpte hausten 2018.

Det var Firda som først omtalte saka.

– Bilen er eit reparasjonsobjekt

Bilen kjøpte han for å sleppe å skru, og for å gjere pendlinga til og frå jobb billegast mogeleg. Men sidan kjøpet har det stort sett berre vore problem, skal vi tru Marius André Langø.

– Eg har fått ein bil som er eit reparasjonsobjekt, hevdar han.

– Først var det dogg og vatn i lyktene. Det var det første eg la merka til etter tre dagar. Så har det kome til meir og meir.

Styrte over i feil køyrebane

Det mest alvorlege han har opplevd då han på veg heim frå verkstad i Bergen opplevde at rattet «låste» seg og drog bilen over i motsett køyrebane.

– Det er ein ganske alvorleg feil. Tenk om det hadde det kome bil imot, seier Langø.

No har bilen vore på verkstad fem gonger. Samstundes syner ein NAF-test, som vart teken då bilen hadde gått 5000 kilometer, 20-25 feil eller manglar. Langø har også fått Bilskadesenteret i Førde til å dokumentere det han meiner er problem med bilen.

– Eg har fått beskjed om at eg melder inn feil som ikkje er feil og at alle punkta var innanfor Tesla sine spesifikasjonar.

– Kva tenkjer du om handteringa?

– Det er altfor dårleg. Dei prøver å legge all skulda vekk frå dei. Dei svarer ikkje på e-post lengre, seier Langø oppgitt.

Den eine gongen han var på verkstad opplevde Langø også at han fekk ein lånebil som verken var registrert eller forsikra. Den saka vart omtala i E24.

150.000 har sett annonsen

Han har brukt over 100.000 kroner på advokat i eit forsøk på å løyse saka. No har han sendt saka til Forbrukarklageutvalet, der han håpar på medhald.

Men no er frustrasjonen så stor at han ikkje orkar å vente, og difor har lagt ut bilen for sal til 605.000 kroner, godt under det han kjøpte bilen for. Han har fått mange tilbakemeldingar på annonsen.

– Det er mange som tykkjer den er morosam, sjølv om den er seriøs, fortel han.

– Hittil har annonsen fått 150.000 sidevisningar, og eg har fått førespurnader frå folk som er interesserte i bilen. Men på grunn av alle feila vil dei ikkje betale så mykje for bilen, seier Langø.

Fryktar stort tap

Helst hadde han sett at Tesla gav han ein ny bil eller i det minste reparerte feila utan kostnader for han.

– Eg fryktar eit stort tap, men eg kjem ikkje til å gje opp kampen.

Langø meiner at Tesla står fram som useriøse utan vilje til å løyse saka.

– Eg forstår ikkje korleis Tesla vil at ein kunde skal ha ein så dårleg bil. At dei ikkje skjemst og fiksar feila, undrar Langø seg.

Tesla får mange klager

I fjor haust melde Forbrukarrådet om klagerekord på bilane til Tesla. Fram til september i fjor hadde dei fått inn 113 klager på bilmerket.

– Av prinsipp kommenterer vi ikkje enkeltkundar i media, men vi ser fram til å få denne saka grundig belyst i Forbrukarklageutvalet. Vi registrerer at kunden forsøker å selje bilen før utvalet får behandla påstandane, skriv kommunikasjonssjef i Tesla Noreg, Even Sandvold Roland, i ein e-post til NRK.

Tesla: – Kundane er fornøgde

Samstundes viser han til ein uavhengig gjennomgang frå magasinet Motor som syner at Tesla sine vurderingar i dei fleste tilfelle er korrekte.

– På generelt grunnlag synest vi det er leit å møte kundar i rettslege instansar. Heldigvis skjer det svært sjeldan. Dei aller fleste Tesla-kundane i Noreg er fornøgde, som dokumentert i blant anna Norsk Kundebarometer 2019, der Tesla med 4/5 stjerner vart plassert i kategorien svært fornøgde kundar. Ei undersøking frå Elbilforeininga viser at Tesla-kundane er mest fornøgde blant alle elbileigarar, skriv Roland i e-posten.