Vuitii John Savio-bálkkašumi 2023
Ingunn Utsi oažžu John Savio-bálkkašumi 2023. Jury ákkastallá ahte dáidagis son čájeha sihke iežas geográfalaš ja kultuvrralaš gullevašvuođa Davvi-Norgii ja Sápmái.
– Utsi bargguid inspirašuvdnan lea sámi dáiddagiehtaduodji, muhto seammás oaidná su bargguin maid viidát fáttáid ja lihkadusaid dálááigge dáidagis, čállá jury.
Lassin Ingunn Utsi nana dáiddalaš bargguide, deattuha jury maid dan ahte Utsi viššalit searvá kultuvrralaš servvodatdigaštallamiidda.
Bálkkašumi vuoiti lea ilus.
– Munnje lea illu ahte John Savio-bálkkašupmi dál juhkkojuvvo viđat geardde, ja ahte dán vuoru lean mun gii oaččun dán gudni. Bálkkašumi árvu lea stuoris sámi dáiddáriid gaskkas, ja máksá ahte bargu maid mii leat dahkan ja dahkat addá fuomášumi ja gudni. Mun illudan ja giittán, dadjá Utsi.
John Savio-bálkkašupmi 2023 lea 200 000 kruvnno, ja dat juhkkojuvvo seremoniijas čakčamánu 23. beaivvi Davvi-Norgga Dáiddamuseas, gos de maid lea ávvudeapmi.