Team Nording&Søring vuittii Offroad Finnmark 300km gilvvu
Maŋŋá 300 kilomehtera ja badjel jándora duoddaris vuittii Team Nording&Søring sihkkelgilvvu Offroad Finnmark 300 km nissonluohká.
– Dat lei hui buorre boahtit mollii, dadjá Lone Johanne Reisænen Nilssen.
Son sihkkelasttii gilvvu fárrolagain Live Kolstad Haanshusain Lillehammeris eret. Nilssen lea ieš Unjárggas eret ja danin lea joavkku namma šaddan Team Nording&Søring.
Bearjadat lei Romssas ja Finnmárkkus garra bajándálki ja dan dovde oasseváldit. Offroad Finnmárku fertii orustit gilvvu dálkki geažil.
– Mis lei veaháš dálkeváttisvuođat go bođiimet Jotkkai. Moai fertiime dohppe vuordit go bođii nu bajándálki. Muhto lei hui buorre dalle boahtit mollii go luite munno olggos dohppe Jotkas, dadjá Nilssen.
Muhto bajándálki ii bisánan Team Nording&Søring vuoittimis. Soai bođiiga mollii Áltái maŋŋá 27 diimmu ja 33 minuhta. Ja nu guhká olgun gal dovdo goruhis.
– Mus lea buorre energiija, muhto lean veaháš sealgáduvvon. Juolggit ja gieđat bávččastit. Dat dovdu veaháš dego lean «mørbanket», dadjá Nilssen movttegit go NRK riŋge sutnje.
