Norgga diimmá Melodi Grand Prix vuoiti Christine Gulbrandsen lea juovlamánu álggus olles vahku johtimin čuojahanmátkis Intrigue lávluin Kai Sombyin. Soai leaba solisttat Musikk i Finnmark girkokonseartaráiddus "Jul Juovllat Joulu".
- Dát šaddá eahpitkeahttá dán jagi stuorámus dáhpáhussan munnje, go munhan in leat ovdal leamaš Finnmárkkus, lohká Gulbrandsen.
- Čáppa luondu
Diibmá vuittii Bergen nieida Christine Gulbrandsen Norgga Melodi Grand Prix gilvvuid. Son lea dan maŋŋá doallan konsearttaid máŋgga sajis Norggas, muhto easkka dál boahtá son Finnmárkui.
Son ii leat gal ovdal leamaš Finnmárkkus, muhto son navdá guovllu hirbmasit su miela mielde. - Munnje vestlándalážžii gal šaddá suohtas oaidnit luonddu mas leat hirbmat stuorra kontrásttat. Davimusas gos dássái lean fitnan Norggas lea Bådåddjos. Muittán ahte go dohko leimmmet seaivumin, de orui hirbmat miellagiddevaš geahččat luonddu. Jurddašin dalle, ahte deikke mun gal áiggošin ruovttoluotta, lohká Gulbrandsen.
- Somás ovttasbargu
Gulbrandsen mielas šaddá suohtas bargat ovttas Musikk i Finnmark musihkkáriiguin, Álttá joatkkaskuvlla musihkkalinjá koarain ja garrarocklávluin Kai Sombyin.
- Dieđán ahte Kai Somby lea rocklávlu, muhto in muitte mii su joavkku namma lea. Mun lean gullan Kai Somby birra ja MySpace interneahttasiidduin lean gullan joavkku musihka. Ja dan hálidan dadjat, ahte Kai Sombys lea erenoamáš buorre lávlonsuopman. Danne šaddá mearihis suohtas lávlut ovttas Kai Sombyin, lohká Christine Gulbrandsen.
Musihkalaččat leaba Kai Somby ja Christine Gulbrandsen áibbas guovttelágánat - masá dego idja ja beaivi. - Dás sáhttá šaddat hirbmat vuogas seaguhus. Intrigue musihkka lea áibbas earálágán go dan maid son ieš ráhkada, muhto joavkkus lea hirbmat buorre musihkka. Son duođaid liiko dasa, lohká Gulbrandsen.
Guhkkin dobbeleappos
Musikk i Finnmark adveantakonseartaráidu álgá Álttá girkus juovlamánu nuppi beaivve. Dasto leat konsearttat Hámmárfeastta girkus, Kárášjoga girkus, Gilivuona girkus, Deanu girkus ovdalgo loahpahuvvo Čáhcesullo girkus juovlamánu čihččet beaivve.
Okta lávlagiin maid Christine Gulbrandsen lávlu lea su iežas lávlla "Langt bortenfor".
- Dát lea munnje hirbmat persovnnalaš lávlla. Dat muitala dan birra, ahte olmmoš galggašii leat nu mo son jo lea ja duostat earáide rahpasit. Dát diehttelasat ii leat miige juovlalávlla, muhto das lea liikká seammá cealkámuš go juovllain lea. Juovllain han maid lea guovddážis doaivva, áibbašeapmi ja ráhkesvuohta guđetguoibmáseamet. Lávlla lea munnje hirbmat dehálaš, ja doaivva livččii ahte guldaleaddjit dáinna lávlagiin buorebut oahpásmuvašivčče munnje, sávvá Christine Gulbrandsen.