Sámi Juristasearvvi njunuš: – In eahpit ahte earátge sáhttet ášši vuolggahit stáhta vuostá
Norgga stáhta lea gieskat vástidan ON:i maŋŋá go ON olmmošvuoigatvuođalávdegoddi cuiggodii Norgga Jovsset Ánte Sara-áššis.
Geassit buvttii lávdegoddi iežas cealkámuša áššis, ja oaivvildit ahte Sara olmmošvuoigatvuođat leat rihkkojuvvon (ON čálus eŋgelasgillii).
Nu go eará láhkadovdit ge juo leat cealkán stáhta vástádusa birra, de oaivvilda Sámi juristasearvvi stivrrajođiheaddji, Helge Ravna, ahte Norga ráđđehus ii juo vástit ge dan cuiggodeapmái mii ON:s bođii geassit.
– Dat mii lea munnje veahá hirpmástahtti lea ahte sii eai vástit justa movt galgá eastadit ahte justa dákkár ášši šaddá fas, ahte SP artihkal 27 (čilgehus dárogillii, Siviila ja politihkalaš vuoigatvuođat 27. artihkal) ii vuot rihkkojuvvo, lohká son.
Stáhta vástida ahte sii leat Boazodoallolágas rievdadeamen njuolggadusaid mat gusket dasa movt boazologu heivehit guohtumiid ektui.
– Diet bargu boazodoallolágain lei juo álggahuvvon go ON cealkámuš bođii dál geassit. Dat ii leat mihkkege ođas. Nu ahte dien vástádusas ieš alddis ii leat nu stuorra mearkkašupmi justa dál gal, mu mielas, lohká Ravna.
Ášši goit ii noga dása, go Stáhtas gártá dál čorgenbargu Sara ektui, go fertejit gávnnahit movt de njulget dan olmmošvuoigatvuođa rihkkuma maid Sarai lea dagahan, dovddaha Ravna.
ON lávdegotti cuiggodeamis sáhttá maid leat boađusin ahte eará boazodoallit, geaid stáhta lea bággen njuovvat, maid sáhttet vuolggahit ášši stáhta vuostá.
– Dat han lea leamaš stuorra ášše-kompleksa. Mun gal navddášin ahte doppe livčče eará áššit mat leat sullasačča. In eahpit ahte earát maid sáhttet vuolggahit ášši, lohká son.
2014:s gáibidedje eiseválddit ahte Sara unnida iežas ealu 350 heakkas 75 heggii, muhto dasa ii miehtan Sara.
Ášši lea gieđahallon diggegottis ja lágamannerievttis, gos Sara vuittii. Alimusrievttis vuoittáhalai. Das maŋŋá son sáddii ášši ON olmmošvuoigatvuođalávdegoddái.
