Alimus hálddahusriekti ii áiggo dutkat váidaga mii lei boahtán Suoma sámedikki jienastuslohkui dieđiheames.
Sámedikki válgalávdegoddi ii lean dohkkehan buohkaid jienastuslohkui, geaid Alimus hálddahusriekti ovddit válggain lei dohkkehan dohko. Hálddahusriekti mearridii ahte ii dutkka váidaga go dás ii lean sáhka iešnjulgemis mas divvot boasttuvuođaid.
Alimusriekti ii vel leat cealkán duomu Kárášjoga-áššis. Nu lea ge ain eahpečielggas galgá go dušše Finnmárkkuopmodat (FeFo) hálddašit ealgabivddu Finnmárkkus, vai gártá go juogadit dán barggu Kárášjoga gieldda ássiin.
FeFo lea otne almmuhan ahte sii dat goit ráhkkanit ealgabivdoválaid juohkimii, go dál lea juo miessemánnu.
– Dán jagáš ealgabivddu almmuheapmi lea maŋiduvvon vuorddedettiin duomu Kárášjoga áššis, muhto mii leat gergosat almmuhit bivddu nu jođánit go duopmu lea celkon, čállá FeFo.