Maŋŋebárgga bođii diehtu ahte sámediggeráđđi Mikkel Eskil Mikkelsen (35) luohpá ráđđelahttun vajot.
Sámediggi oaččui dán dieđu jo vuossárgga.
Seamma beaivve válde politiijat su gitta go su vuorkkás gávdnui materiála, mas mánát illástuvvojit seksuálalaččat.
Son lea dovddastan iežas sivalažžan, čuožžu diggemearrádusas.
Su leat dál áššáiduhttán go son lea dán jagi juohkán ja maiddái háhkan alcces materiála, mas mánát illástuvvojit seksuálalaččat dahje main mánát oidnojit seksualiserejuvvomin.
Mikkel Eskil Mikkelsen lea leamaš NSR ráđđelahttun sámediggeráđis 2017 rájes.
Sámediggeráđis leat njunuš sámi politihkkárat. Ráđđi lea dego Sámedikki ráđđehus, ja ovddasvástida beaivválaš politihkalaš doaimma.
Su bargun leamaš earret eará bajásšaddan-, oahpahus- ja nuoraid politihkka.
Mikkel Eskil Mikkelsenas leamaš ovddasvástádus bajásšaddan ja nuoraid politihkas Sámedikkeráđis.
Foto: Håkon MudeniaHáldogiddagasas
Son biddjo vuos háldogiddagassii guovtti vahkkui - gitta skábmamánu 19. beaivái, muitala Nordlándda politiijaguovllu politiijaadvokáhta Eirik Magnus Blomli NRK:i.
– Dál lea vuos menddo árrat almmuhit maid leat gávdnan. Fertet oaidnit maid gávdnat dáid elektrovnnalaš biergasiin mat leat duoguštuvvon, lohká Blomli.
Nordlándda politiijaguovllu politiijaadvokáhtta Eirik Magnus Blomli lohká Mikkelsen lea giddagasas guokte vahkku, dáhkidan dihte ahte duođaštusat eai jávkka.
Foto: Vetle Mathiesen Knutsen / NRKPolitiijat dárkkistit buot kommunikašuvnna, sihke reivviid ja gussiid dan botta go Mikkelsen lea giddagasdilis.
– Son oaččui spiehkastanlobi reive- ja guossástallangildosis dieđihit ahte son luohpá buot ámmáhiin Sámedikkis, dieđiha sámediggepresideanta Silje Karine Muotka NRK:ii.
Mikkelsen ii lean ieš das go riektecealkámuš bođii. Son lea miehtan háldogiddagassii biddjot.
Mikkelsena bealušteaddji, Ole Kristian Sandvik, dieđiha NRK:i ahte eai áiggo kommenteret ášši vuos.
Sámediggepresideantta nammadii gaskavahko ođđa ráđđeláhttu gii váldá badjelasas Mikkelsena bargguid.
Šohkka presidentii
– Lei šohkka munnje, dadjá sámediggepresideanta Silje Karine Muotka go Mikkelsen lea áššáiduhtton.
Avgått sametingsråd er siktet for besittelse av overgrepsmateriale mot barn. Han erkjenner straffskyld, ifølge sakspapirene.
Son čilge ahte son oaččui diehtit áššáiduhttima birra muhtimis vuossárgga dii. 15.30.
– Manin ehpet leat almmuhan almmolašvuhtii dán áššáiduhttima birra dieđuid ovdal?
– Mun in leat sáhttán danin go politiijat leat dutkamin ášši, dadjá Muotka.
Son dadjá ahte Sámediggi veahkeha politiijaid dutkkadettiin ášši.
Leat go ollesolmmoš geas lea seksuála beroštupmi mánáide? Loga eambbo dikšofálaldaga birra: Det finnes hjelp.