Ungárlaš filbmaoasti Oliver Shiflish lea All Eastern Europe fitnodaga ovddas leamaš geahččamin filmmaid Cannes filbmariemuin.
Nils Gaup Guovdageainnu stuimmiid filmma son osttii Nuorta-Eurohpálaš riikkaide almmá geahčakeahttá dan. Dasa sus lea sierranas čilgehus.
Guhká bargan filmmaiguin
Oliver Shiflish lohká iežas eambbogo 20 jagi leamaš filbmaoastinbarggus. Son lohká iežas bures muitit Nils Gaupa vuosttaš filmma "Ofelaš".
- Go oidnen dán filmma, de dadjen ahte dá lea juoga earálágán. Dát lea nubbi čilgehus. Nubbi čilgehus leat dat, ahte hálidivččen filbmageahččiidasan čájehit máŋggalágán filmmaid, muitala Shiflish.
- Filmmaid válljen doaibmá seammáláhkái go čájehit iešguetlágán herskuid dahje njálgga borramušaid. Mađi eambbo herskot dus leat beavddi alde, mađi stuorát válljemuš dus lea, ja dađi stuorát vejolašvuohta lea dus mearridat mii lea njálgámus hersko, čilge Oliver Shiflish.
- Dál son lea nu duhtavaš go sus leat mielde ruoktot máŋgga eará riikkaid filmmaid gaskkas maiddái norgalaš filbma, mojohallá ungárlaš filbmaoasti.
Máŋgii geahččan Ofelaš-filmma
Oliver Shiflish lohká iežas máŋgii geahččan "Ofelaš"-filmma ja dasa son gal duođaid liiko.
- Filmmas lei buorre leaktu. Hirbmat buorit karakterat. Ja muitalus lei hirbmat buorre, rámida Oliver Shiflish Nils Gaupa Ofelaš-filmma.
Ungárlaš filbmaoasti ii leat almmatge geahččan Guovdageainnu stuimmiid filmma. Liikká son mearridii dan oastit Nuorta-Eurohpái almmá geahčatkeahttá dan. Dasa su leat dákkár čilgehus:
- Don áddet, ahte jus don vuos leat galledan restoráŋŋa gos leat máistán mearihis njálgga borramuša, de don it eahpit jus boahtte heave go boađát dohko fállet dutnje eará borramuša. Don dieđát jo, ahte sii dánge máhttet ráhkadit albmaláhkái, čilge Shiflish.
Danne Oliver Shiflish ii eahpidan ii sekunddage go Nils Gaup ođđa filbma fállojuvvui Nuorta-Eurohpái.
- Seammá bagadalli
- Diehttelasat, dáshan lea seammá bagadalli, binnánaš boarraset go vuosttaš filmmas, muhto olu eambbo hárjánan. Hirbmat čáppa guovllus filbmejuvvon, sullii seammá sajis gos Ofelaš-filbma filbmejuvvui. Danne dátge filbma galggašii leat buorre, navdá Oliver Shiflish.
Son lohká diehtit, ahte filbmageahččit liikojit geahččat feara makkár filmmaid. Eai dárbbaš álo leat dat ovttahat gelddolašfilmmat, komediijat ja dien diekkárat.
- Nils Gaup filmmat leat earálágánat. Dat leat sierra vuogi mielde ráhkaduvvon, oaivvilda Shiflish.
- Lávvu guovdo Moskva-gávpoga
Son hálidivčči, ahte sii vuosttaščájálmasaid oktavuođas sáhtášedje cegget sullasaš lávu go dat mii lei Cannes gávpogis.
- Dákkár galggašii leat guovdo Budapešt, Warzawa dahje Moskva. Dán láhkái livččii vuogas vuovdalit filmma Nuorta-Eurohpá filbmageahččiide, sávvá Oliver Shiflish.
