Ådå prográmma «Skårungen» dal ruvvaláhkáj báddiduvvá. Prográmma le Lofåhta-guollima birra, ja ij la guhkás ájgge dallutjijs gå prográmmajådediddje Hábmeris ietjas sábmen gávnaj.
– Suddo gå iv sámegielav buvte, javllá P3-Silje.
Foto: Kim Erlandsen / NRK– Ij la nav mælggat dat rájes gå dav ájtsajma. Guoradallat gåsstå boadáv le huj miellagiddis, javllá Silje Nordnes, gudi l dåbdos radioprogrammas «P3-Morgen».
Berrahijt ruodtsim
Maŋemus ájgijt le suv áhttje berrahijt guoradallam. Diehtet makkir máttos le, le suv mielas ávkálasj gå dal Lofoahttaj manná, ja ájádusáj sinna le Buks-Beret, gudi lij oajvven ietjas tjevsan gå lij guollimin.
– Le áhtje bieles. Sån la álgos Nordnesas, Sálatvuomen. Muv áhtje máhtaráhkko lij sábme. Giesen avta subtssasav sáme áhkátja birra gulliv. Buks-Beret, gudi lij nav buossje ja Lofoahttaj guollitjit manáj. Gå dal danna galgav liehket, várij ja ábij gaskan, de guláv dagu varravárijn skåvvu. Dåbddu dagu sijdan lav.
Ietjas dåbddåt sábmen le ájnas suv iesjdåbddåmij, valla jus boahtteájgen gápptáj tjágná, dav ij rat iesj diede.
– Dát le oasse muv identitehtas ja lav dassta mihá, ja muv mielas le nav suohtas. Áhttjám le gáptev åttjudam, valla jus iesj dav galgav dahkat, dav iv ájn diede. Iehpesihkarvuodav dasi dåbdåv, danen gå iv gielav sáhkadit buvte.
Ássjev låggŋi
Silje Nordnesa ieme barggo le P3-Morgenav jådedit.
Foto: Ole Kalland / NRKNordnes le oahpes radio-giella, ja dan aktivuodan le suv mielas ájnas sån iesj sáme ássjij birra færtbæjvvásasj láhkáj giehttu, vaj máhtudahka ulmutjij gaskan lassán.
– Gå mujna l dakkir barggo gånnå nuorra ulmutja muv juohkka biejve gulli, de dåbdåv åvdåsvásstádusáv dáj ássjij birra giehttot. Dan láhkáj de máhtudahka lassán, ja de sjaddá oasse ulmutja dádjadusájn.
Skårungen jahkemålssåmin NRK1:an vuoseduvvá.
