NRK Meny
Normal

Máhte borggat ja Máhte heajos dálkkit

Odne guovvamánu 24. beaivvi lea Máhtebeaivi. Jus dán beaivvi lea bivval, de buolašta. Seammás álget Máhteborggat. Dalle maŋŋel sáhttá njázudit, ja nu sáhttá dagahit ruovdecugŋo.

Guovdageainnus borga ja muohtahevro

Geahča videos muohtahevrro.

Dološ sápmelaččat leat luonddu lagasvuođaset vuođul olles jahkái merkon dihto beivviid, mat muitalit dálkedieđuid. Daid vuođul einnostedje dávjá makkár dálki, ilbmi ja jahkeáigodatdálkkit ledje vuordagis.

Dalki

Guovdageainnus muohtahevro ja borgačalmmit.

Foto: Máret Biret Sárá Oskal / NRK

Máhtebeaivvi borgá

Máhtebeaivvit leat guokte: ođđa Máhtebeaivi (24.2.) ja boares Máhtebeaivi mii lea 12 beaivve maŋŋá go ođđa. Máhtebeaivvi lea dálvi beallemuttos. Dađi mielde go buollašat nohket, de borgagoahtá. Guovža, mii lea čakčat nohkkan, jorgala gilgga Máhtebeaivvi.

Máhtebeaivvi borgáge nu ahte jus ovdal eai leačča jovgon viesut, áiddit dahje fatnasat, de dál juobe jovgojit.

Máhtebeaivi maid lea leamaš katolalaš girku bassebeaivi, man gudnejahtte Bassi Mahtiasa muitun. Son lei Jesusa apostal dan maŋŋil go Judas Iskariot ii lean šat. Girkostallama gohčodedje Máhtemeassun, ja dat dollui eahkeda ovdal Máhtebeaivvi.

Uvær på Saltfjellet

Máhtebeaivvi dávjá lea borga ja hui heajos dálkkit.

Foto: Statens vegvesen

Dálkediida

Lávejit lohkat ahte dalle leat Máhteborggat ja Máhte heajos dálkkit. Dat mearkkaša ahte dan beaivvi borgá.

Dálkediidan lohke: Jus lea čoaskkis Máhtebeaivvi, de bohtet bivvalit dálkkit. Muhto jus Máhtebeaivvi lea bivval, de bohtet galbmasit dálkkit farggabáliid.

Dán vahkku gohčodit maiddái Máhtevahkkun.

Lullisápmelaččat bivdigohtet njágáid

Geamadat Guovdageainnus

Guovdageainnus lei odne geamádat.

Foto: Máret Biret Sárá Oskal / NRK

Lullisápmelaččat bivdigohte Máhtebeaivvi njágáid ja dát bivdu bisttii gitta Márjjabeaivái. Rávddu juoŋasteapmi bisttii gitta dassái go jieŋat sudde jávrriin. Dajahussan lea ahte Máhtebeaivvi álggahuvvo eahkedačča málesteapmi go guovssu ihtá, Márjjabeaivvi fas ovdalaš go beaivváš jávká. Dološ olbmot sávve ahte boares Máhtebeaivvi ovddabealde ii galggaše eisege bivaldit iige njázudit amas šaddat garra giđđa.