Sámi grafihkkár vuoitá dáiddabálkkašumi

Tomas Colbengtson lea vuoiti «Queen Sonja's Print Award», mii lea bálkkašupmi gráfalaš dáidagis.

Dronnet Sonja geige bálkkašumi ieš Colbengtsonii Bådåddjos geassemánu 5. beaivvi. Bálkkašupmi juhkkojuvvo juohke nuppi jagi.

- Mun lean hui movttat go dán jagáš bálkkašupmi juhkkojuvvo sámi dáiddárii. Tomas Colbengtssona dáidagat leat juo museačoakkáldagain ja doaivvun ahte dát bálkkašupmi dagaha su barggu ain eanet dovddusin riikkaidgaskasaččat, dadjá Dronnet preassadieđáhusas.

Colbengtson lea máttasápmelaš, gullevaš Derdnii Ruoŧa bealde.

Besse fas ruoktot

Ássit geat šadde guođđit ruovttuideaset ikte eahkes, Sáččá suohkanis Romssas, besse fas ruoktot iđđes. Sii fertejedje vuolgit go báikkis njirai eanan ja geađggit. Dál leat geologat árvvoštallan ja gávnnahan ahte guovlu lea oadjebas.

Dáhpáhusa geažil ii roasmmohuvvan oktage.

Čađahit dutkama borgguheami birra

Buohkat geat leat boarráseappot go 40 jagi Trøndelágas bovdejuvvojit dál searvat dutkamii borgguheami ja eallinvugiid birra. Ulbmil lea gávnnahit geas lea alimus riska oažžut geahpesborasdávdda.

Jus leat borgguhan 100 sigareahta eallinagi čađa, de sáhtát searvat, čállá Adresseavisen.

– Ulbmil lea gávdnat dan buoremus ja eanemus dárkilis kalkuláhtora mii sáhttá meroštallat makkár jáhkehahttivuohta lea ahte oažžut geahpesborasdávdda, nu ahte mii boahtteáiggis sáhttit fuomášit borasdávdda árrat ja dálkkodanmuttus, dadjá Oluf Dimitri Røe, NTNU-professor ja Levanger Sykehus váldodoavttir.Jearaldat searvat sáddejuvvo buohkaide geat leat badjel 40 jagi, Digipost bokte - ja vástidit dan ádjána unnit go vihtta minuhta.

Leat 240.000 olbmo Trøndelágas geat bivdojuvvojit searvat iskkadeapmái.

(NTB)