Borgemánu 30. beaivve Imandra Viking Fest -doaluin Mončegorsk gávpogis politiijat bohte Danilov lusa ja gáibidedje su čájehit mii su lávkkas lea.
Sámi árbbi ja ovdáneami foandda direktevra Andrej Danilov biehttalii čájeheames dan almmá vihtaniid haga.
Danilov sániid mielde su vuostá politiijat geavahedje rumašfámu. Dalle son ieš riŋgii politiijastašuvdnii ja ávžžuhii sáddet su lusa eará politiijajoavkku. Das maŋŋá ášši guorahalle politiijastašuvdna.
Andrej Danilov lea maid Sámiráđi várrelahttu, ja Sámiráđi presideanta Christina Henriksen atná dáhpáhusa duođalažžan.
– Dát lea hui suorggahahtti midjiide, muhto eanemus dieđusge Andrejii. Midjiide lea váttis diehtit justa manne dát dáhpáhuvai, muhto mii leat giitevaččat go lea beassan ruoktot ja ahte suinna manná bures, lohká Henriksen.
- Loga maiddái:
Geavahedje rumašfámu
Mončegorsk báikkálaš duopmostuolus čilgejit B-Port.com neahttasiidui, ahte politiijat bivde Danilova guođđit riepmobáikki.
Son galgá leat vástidan fastit politiijaide ja biehttalan guođđimis báikki. Danilov čilgii politiijaide, ahte son lea almmolaš ráđi lahttu, mii gullá sisriikkaáššiid ministeriija vuollái.
Danne ii lean politiijas vuoigatvuohta su gohččut guođđit báikki.
Duopmostuolu ja Danilov iežas dieđuid mielde lei sámeaktivista áibbas čielggus go dát dáhpáhuvai.
Báikkálaš duopmostuollu áššáskuhtii Danilova vuostálastimis politiijaid gáibádusaid ja dubmii su viđa jándorii giddagassii.
Dál Danilov lea beassan luovus ja iežas advokáhtain áigu váidalit duomu, go su mielas ášši guorahalle olu rihkkosiiguin.
Danilov čuoččuha maid ahte sivvan dilálašvuhtii lea su politihkalaš doaibma ja vuostálastin eiseválddiid prošeavttaide, mat sáhttet bilidit sámeeatnamiid.
Ráfálaš miellačájáhus
Logi jagi dás ovdal válde Lujávrri politiijat gitta Ruošša Sámedikki dalá ságadoalli Valentina Sovkina ja guokte eará sámenissona.
Sii dolle ráfálaš ja jaskes miellačájeheami Lujávrri geasseriemuid oktavuođas.
Miellačájeheami duohken ledje Murmánskka fylkka gaskaboddosaš Sámediggi ja guovllu sámiid searvi OOSMO. Akšuvdna dollui danne go sámit háliidedje čájehit vuosteháguset Ruošša sámepolitihkkii ja go ledje manahan guolleeriid, mat sámiin guhká leat leamaš.
Lujávrri politiijat eai lean addán lobi doallat miellačájeheami. Danne ledje 53 sápmelačča válljen doallat juogalágán «persovnnalaš» miellačájáhusa.
Golbma aktivistta váldojedje gitta ja dolvojuvvojedje politiijastašuvdnii. Doppe sii doalahuvvojedje golbma diimmu go daddjui sin rihkkon riikkalága, mii guoská almmolaš doaluide.
– Dákkár dáhpáhusat muitalit, ahte soaitá leat váttis searvat politihkkii Ruošša bealde. Mii almmatge eat dieđe gulletgo dát dáhpáhusat oktii, dadjá Christina Henriksen.