– For laks går det fint an å doble produksjonen i Rogaland, berekraftig, seier administrerande direktør i Skretting, Erlend Sødal.
Skretting er verdas største produsent av fiskefôr, og held til i Hillevåg i Stavanger. Her meiner dei at det ligg eit stort potensial for meir havbruk i Rogaland.
– På lang sikt kan laks bli den nye olja, seier Sødal.
- LES OGSÅ:
- LES OGSÅ:
Kan bli eit nytt eventyr
– Det er ei veksande og god næring, som kan bli eit stort nytt eventyr, seier fylkesordførar i Rogaland, Solveig Ege Tengesdal.
I dag var ho og fleire av ordførarane frå kystkommunane i Rogaland samla hos Skretting. Det var fylkeskommunen som hadde teke initiativet til møtet, og målet var å gi kommunane eit større innblikk i kva moglegheiter som finst innanfor havbruksnæringa.
– Eg opplev at næringa og bransjen ser at det er eit stort potensial i Rogaland for å veksa. Så no trur eg det er litt opp til kommunane, at dei raskt kan få avklart kva område ein kan leggja til rette for oppdrett, seier Ege Tengesdal.
Og dersom kommunane ynskjer å opna for meir oppdrett, vil fylket spela på lag ved å opne nye areal for havnæringa, seier Tengesdal.
– Me er alltid positive til å leggja rette for næringsutvikling, og havbruk er veldig viktig for oss i denne samanhengen. Så me skal i alle fall bidra det me kan for å vera ein pådrivar.
- LES OGSÅ:
Vil sjå på kva moglegheiter som finst
Randaberg-ordførar, Kristine Enger, var ei av dei som var til stades i dag. Kommunen har eit stort sjøareal, og meir havbruk i kommunen, ser ho på som ein interessant tanke.
– Eg har lært mykje i dag. Og eg vil ta det med meg tilbake og sjå på om det er mogleg å leggja til rette for havbruk innanfor Randaberg sine grenser, seier Enger.
Men om det blir ein realitet, står att å sjå.
– Eg veit ikkje endå, fordi det må meir kunnskap til for å kunne avgjera om det er areal i Randaberg som kan vera aktuelt for oppdrett. Men Randaberg har mykje kystareal, og eg veit at oppdrettsnæringa no ser lenger ut i havet, og då kan det godt vera at det er areal i Randaberg som er eigna til oppdrett, seier Enger.