– Trist, er dagleg leiar i Oilers, Kjetil Bøe, sin kommentar til kampkollisjonen.
– Og det er ikkje første gong det skjer, legg han til.
- Sjå også:
Det skjer på onsdag og det har skjedd før. Eitt år spelte Oilers den siste og avgjerande finalekampen i ishockey-cupen, på same tid som Viking spela heimekamp i fotball. Nå er det på an igjen.
– Det er utruleg at det blir slik i år igjen, men me får ta det med oss og prøve å unngå det til neste år, seier dagleg leiar i Viking FK, Eirik W. Henningsen.
Laga samarbeider
Kampane i eliteserien er bestemte lang tid i førevegen. Finalekampane i sluttspelet i ishockey er også planlagde for lenge sidan, men at Oilers skulle vera med blei først klart for ei veke sidan.
Det laga har klart å bli samde om er å halda publikum oppdaterte, minutt for minutt, om korleis det går i den andre kampen. Så ingen skal gå glipp av resultatet og av kven som skårar måla.
Vanskeleg val for mange
– Utan å vite det sikkert vil eg tru at mellom 500 og 1000 personar er faste publikummarar både hos Viking og hos Oilers, seier dagleg leiar i Oilers, Kjetil Bøe.
Det er desse som står framføre eit vanskeleg val på onsdag kveld.
– Men truleg vel dei fleste oss, seier Bøe.
For det er meir som står på spel i ishockeyfinalen enn i ein tidleg seriekamp i eliteserien.
- Les også:
– Brannkampen er viktig
I Viking-leiinga gleder dei seg over å ha passert 9000 selde billettar til vestlandsderbyet mot Brann på onsdag. Dette talet inkluderer alle dei som har kjøpt sesongbillett, men også laussalet av kampbillettar er betre enn på ei stund.
I tillegg er det meldt om at 300 brannpatriotar kjem til Viking stadion på onsdag.
- Les også:
– Eg kan ikkje seie noko om kor store billettinntekter me misser som følge av at Oilers spelar på same tida, seier Viking-leiar Henningsen.
– Me får heller akseptere det og vera stolte av å ha to idrettslag i byen, som begge er i toppsjiktet i Norge, seier han.