– Eg kom til konsertområdet, også såg eg ei svær scene og lys frå bakken. Plutseleg kom artisten Marshmello opp på scena og byrja å spele musikk, seier Simon Egeland Rovik (14).
Saman med over ti millionar andre var han vitne til noko heilt spesielt. Den aller fyrste konserten på det populære spelet Fortnite.
I forkant av konserten blei det lansert på Marshmello si turnéliste at han skulle halde ein konsert i Pleasant park som er eit område i Fortnite. Like før konserten byrja vart våpen teke frå spelarane og det var ikkje mogleg å drepe andre spelarar medan konserten gjekk føre seg.
Artisten var på scena i ti minutt, og publikum dansa og kosa seg på det virtuelle konsertområde. I realiteten sat spelarane framfor ein skjerm med headset og mikrofon. Men det var likevel ein suksess.
– Det var ei unik oppleving, seier Egeland Rovik.
Det var Tek.no som omtalte saka fyrst.
Når ut til fleire
Enn så lenge er dette ei unik oppleving. Men i framtida vil vi kunne oppleve fleire virtuelle konsertar, meiner Ole Jørgen Nordvik, produsent og programleiar i P3 Gaming.
– Fortnite er eit spel som baserer seg mykje på popkulturen. Både med at figurane kan danse og sidan det er musikk i spelet. Eg er ikkje sjokkert over at konserten vart vellykka, seier Nordvik.
Via spel og andre populære trendar kan artistar nå ut til eit anna publikum enn tidlegare.
I etterkant av konserten la Marshmello ut ei melding på Twitter kor han takka publikum. Han var glad for at mange av tilskodarane fekk oppleve sin aller fyrste konsert.
Utvidar konsertkulturen
Tone Østerdal er dagleg leiar i Norske konsertarrangørar. Ho hadde ikkje høyrt om denne typen konsert før me tok kontakt med ho.
Østerdal synest det er eit spennande konsept, men fryktar ikkje at virtuelle konsertar skal ta over for tradisjonelle konsertar.
– Eg trur slike konsertar kjem til å fungere som eit supplement til tradisjonelle konsertar, og på den måten vere med på å utvide konsertkulturen, seier Østerdal.
Egeland Rovik legg ikkje skjul på at han likte konsertopplevinga. På facebookgruppa Fortnite Norge, har fleire medlemmar skreve kor godt dei likte arrangementet.
– Det her var kule greier! Håpar vi får fleire slike arrangement i framtida, skriv eit medlem av gruppa.
NRK har prøvd å få kontakt med EpicGames og Marshmello utan hell.
Sjå video av konserten på Youtube.
- LES OGSÅ: Trur nytt spel kan utkonkurrere Fortnite