Sjå sendinga vår frå Solamøtet

Januar er månaden for gode hensikter, nedpakking av julepynt og i Rogaland: Solamøtet. Til den årlege næringspolitiske samlinga i Sola kjem både næringslivsaktørar, politikarar og sjølvsagt kommentatorar og journalistar.

Du kan sjå heile møtet i videovindauget øvst i saka.

Årets tema er «Rogaland grip moglegheitene». Dei seinare åra har livet etter olja på ulike vis vore oppe på konferansen. Det har òg blitt lekkasjar om statsrådsbyte og hard debatt om kommunesamanslåingar.

Men tilbake til framtida: Den kjem truleg òg opp i 2020.

– Reduksjon av inntektene frå tradisjonell olje- og gassverksemd vil gi dramatiske kutt i velferdsnivået i Noreg, viss vi ikkje greier å skape nye verdikjeder basert på lønsame verksemder. (...) Skal Rogaland ta ein leiande posisjon i omstillinga, må vi gripe moglegheitene desse fortrinna gir oss, skriv arrangøren NHO om programmet.

På lista over føredrag står dessutan mellom anna «Verdien av berekraft» (Thina Saltvedt, Nordea), «Equinor i framtidas energilandskap» (Eldar Sætre, konsernsjef) og «Omstilling i leverandørindustrien» (Mads Andersen, Aibel).

Det same gjer «Flytande havvind – eit nytt industrieventyr?» (Astrid Skarheim Onsum, Aker Solutions) og «Bedriftenes neste trekk» (Ole Erik Almlid, NHO). Statsminister Erna Solberg skal snakke om eit berekraftig velferdssamfunn.

Nasjonalbibliotekar Aslak Sira Myhre er ein av dei første på podiet når han skal snakke under overskrifta «Fortid og framtid, Rogaland for alltid».

Dessutan: Det blir truleg humring i salen når Ken André Ottesen, betre kjend som BA-desken på Instagram, skal vise fram sin Rogaland-edition.

Vanlegvis plar møtet å gå over to dagar. Slik blir det ikkje i år. I år blir dagen kor næringslivet møter stortingspolitikarane frå Rogaland, avlyst.

Årsaka er at mange av stortingsrepresentantane frå Rogaland er blitt kalla tilbake til Stortinget for at det skal bli avgjerdsdyktig, skriv Stavanger Aftenblad. Bakgrunnen for det igjen er at mange andre stortingspolitikarar er på reise.