Rolf Martin (75) har ingen planar om å slutte i jobben: – Eg tar fem år av gongen

– Det betyr mykje når ein har god helse og kan halde på med noko sånt. Eg gjer mykje heime òg, men ein saknar jo kameratar på jobb.

Det seier Rolf Martin Time (75), som ikkje var særleg begeistra for tanken på eit typisk pensjonisttilvære.

Han stortrivst med å køyre gravemaskin, som han har drive med dei siste 60 åra.

– Eg har jo drive med dette heile livet. Eg har prøvd å slappe av, men ein saknar det. Det er best å halde seg litt i vigør, synest eg.

25 pensjonistar som ringevikarar

Time er éin av 25 pensjonistar som framleis er i arbeid delar av året hos Stangeland Maskin. Pensjonistane er heilt avgjerande for at bedrifta skal få jobben gjort.

– Dei som går av med pensjon er veldig gode å kunne ringe, seier Mette Idland, personalleiar ved Stangeland Maskin.

Idland fortel at bedrifta kunne ha valt å hente inn ressursar frå eit bemanningsbyrå.

– Men dei kjenner ikkje oss, prosjekta eller maskinene, seier Idland, som derfor synest Stangeland-pensjonistane er ei betre løysing.

Ho fortel at gravemaskinførar Time kan få køyre så lenge han har lyst. Bedrifta har ikkje sett noko øvre grense.

– Men han må kunne halde ved like sertifikatet og gjere ein god jobb, seier Idland.

Ein av fem over 70 år i 2050

Regiondirektør Tone Grindland i NHO Rogaland ser store fordelar ved at fleire eldre fortset i arbeid. Eldre arbeidstakarar er ofte trygge i jobben, og har kunnskap og erfaring som er viktig å dele vidare, påpeikar ho.

– Matchen mellom ein ung og ein eldre er veldig verdifull, seier Grindland.

• I 2050 er omtrent forventa ein av fem nordmenn å vere 70 år eller eldre, viser tal frå SSB.

– Det vil vere ein krevjande situasjon å skape verdiar i, dersom ein skal halde oppe same produktivitet som i dag, seier Grindland i NHO.

Men fleire eldre har, til liks med gravemaskinføraren Time, lyst og kapasitet til å jobbe.

– Eg held nok ikkje på i 60 år til, men eg tar fem år av gongen, seier Time.

75-åringen kjenner fleire jamaldra som kunne tenkt seg å komme tilbake til arbeidslivet.

– Eg har snakka med mange som saknar å ha noko å gjere på. For det er jo ikkje så mykje å gjere når ein sit i eit hus eller ei leilegheit, seier han.

Direktør i Senter for seniorpolitikk, Kari Østerud, meiner det stadig blir viktigare at eldre står i arbeidslivet.

– Avgangsalderen har auka, men det bør han også fortsette å gjere. Skal vi klare å finansiere velferdssamfunnet i framtida, er yrkesaktive seniorar ein del av løysinga.

Ho peikar på ei rekke faktorar som påverkar kor lenge vi jobbar (sjå faktaboks under), inkludert kultur, økonomi og helse.

• Godt vaksne tilsette er noko av det beste som har skjedd norsk arbeidsliv, meiner Ole Fredrik Nordbye i NLA Høgskolen.

– Vi treng ei haldningsendring

NHO-Grindland fortel at mange leiarar oppgir å vere fornøgde med eigne seniorar. Samtidig vegrar dei seg for å tilsette folk i 60-åra.

– Vi må endre måten vi tenker om dette på. Korleis vi praktiserer og korleis vi legg til rette. Arbeidstakarar må tenke at det er interessant å jobbe litt lengre.

Ho trekker fram ei NHO-måling frå 2021, der svært få bedrifter inkluderte «alder» som ein del av arbeidet rundt mangfald.

– Vi ser jo at aldersdiskriminering er vanleg i arbeidslivet i Noreg, seier Grindland og fortset:

– Eg trur vi treng ei haldningsendring, og det er viktig å vere merksame på den ressursen ein finn i eldre arbeidstakarar.

• Det tar dobbelt så lang tid å få ny jobb når du er over 55 år samanlikna med yngre arbeidssøkarar, ifølge SSB.

Har du fått med deg Noregs kulaste kranførar? I 2020 besøkte vi Torun Berg, som da var 63 år gamle, på jobb i Stavanger:

Hei!

Tenkte du på noe da du leste denne artikkelen? Eller har du et tips til andre saker vi burde sjekke ut i NRK?

Send meg gjerne en e-post!

Elise Pedersen

Journalist

Send meg en e-post