– Det går stadig ras der, og som ordførar så er det første eg tenkjer på, spesielt etter regn og uvêr: Korleis gjekk det med skulebussen denne gongen? seier Gerd Helen Bø (Sp), ordførar i Suldal.
I dag var sentrale politikarar og organisasjonsfolk frå Ryfylke samla på Forus, for å diskutera framtida til Riksveg 13.
- Les også:
Der var også stortingsrepresentant Roy Steffensen (Frp) som kom med ein lekkasje frå Norsk Transportplan (NTP).
– Tunnelen langs Rødsliane kjem. Den står på NTP-lista etter 2024, i den andre planperioden, seier Steffensen.
Ein god dag
Roy Steffensen meinte at han kom med ei god nyheit til riksveg 13-forsamlinga i dag. Tunnelen kjem på lista over rasutsette strekningar som skal utbetrast, men den nådde ikkje høgt nok opp til å koma med i den første perioden fram til 2024.
– Dette handlar om taudraging mellom politikarar frå fleire parti og frå alle delar av landet, og då blei det andre periode før Rødsliane-tunnelen er på plass på riksveg 13, seier Steffensen.
- Les også:
Misnøgd med lekkasjen
– Eg hadde jo håpt at dei kunne ha framskunda denne tunnelen og fått den inn i første periode. For me sender skuleungane våre i buss på denne vegen kvar vekedag, seier ordførar Bø.
- Les også:
Steffensen held fram at regjeringa har sett av 24 milliardar kroner dei neste 12 åra, til rassikring på vegar i Norge. Det er han godt nøgd med, men altså ikkje forsamlinga han talte til i dag.
– Då han sa Rødsliane, så tenkte eg at nå skjer det noko fort, seier Bø.
– Men så datt eg litt i hop då eg høyrde at det ikkje kom til å skje før i den siste perioden, seier ordføraren.