Glede i vekst-og vindkraftkommunar

Ordføraren i Klepp kommune på Jæren har tidlegare år opplevd at dei statlege tilskotta til ein kommune i sterk vekst, ikkje har halde følge med veksten i utgiftene.

– Når folk flyttar hit må me byggje ut barnehagar og skular for å få plass til ungane. Dette er utgifter me ikkje får igjen på skatteseddelen før det har gått fleire år, fortel høgreordføraren, Ane Mari Braut Nese.

I dag ser ho derimot svært så lyst på situasjonen. Det er eit resultat av lekkasjar frå statsbudsjettet. I fjor fekk kommunen 1.9 millionar kroner i veksttilskott. I år får dei meir enn dobbelt så mykje som i fjor.

– i 2015 får me 4.5 millionar kroner over denne posten, seier Braut Nese.

• Se fullstendig liste over veksttilskott nedst i artikkelen.

Endra regelverk

Det er nesten 70 kommunar i heile landet, som nå får status «vekstkommune». Kravet er at dei i gjennomsnitt har hatt ein folkeauke på 1.6 % eller meir dei siste tre åra.

Alle dei tre Jærkommunane Klepp, Time og Hå, oppfyller truleg dette kravet. Ein annan stor kommune som er kjent med sterk vekst er Sandnes i Rogaland.

– Det er godt å oppleve at kravet vårt om høgare veksttilskott nå har blitt tatt på alvor, seier høgreordførar Braut Nese.

• LES OGSÅ: Vekstkommunane var taparar i fjor

Vindkraftkommunane jublar

– Ja det er omtrent slik at me kunne ha reist flagget, seier ein annan høgreordførar, Marthon Skårland i Bjerkreim kommune.

I årevis har det versert planar om ei stor vindkraftutbygging i kommunen, men foreløpig har det ikkje blitt noko av.

I statsbudsjettet blir det klart at dei same avskrivingsreglane som i dag gjeld i Sverige, dei skal også gjelde i Norge frå neste år.

– Det har blitt gitt konsesjon til ein 340 megawatt stor utbygging, utan at selskapet har starta opp. Men får me same reglane som i Sverige så trur eg den oppstarten skjer innan kort tid, seier Skårland.

• LES OGSÅ: Her er «lekkasjane» regjeringa vil ha blest om

Tunnelar skal oppgraderast

Tunnelane som er på fylkesvegane rundt i landet, skal innan fire år vera av like så god standard som tunnelane på riksvegane er.

– Det er målet til regjeringa og derfor får for eksempel Rogaland 14.2 millionar kroner til oppstart av dette arbeidet i 2015, seier stortingsrepresentant Roy Steffensen frå Frp.

Også på dette området ser det ut til at Bjerkreim-ordførar Marthon Skårland blir ein vinnar i dette statsbudsjettet. Fire fylkesvegtunnellar er å finne på vegen frå sentrum i Bjerkreim og inn til Ørsdalen.

– Spesielt den siste er i så dårleg forfatning at den verkeleg treng ei god opprusting, seier Skårland.

Ber om ei sak

Når det gjeld kva tunnelar som skal prioriterast først, blir dette ei sak for fylkespolitikarane i Rogaland.

– Me kjem til å be om at administrasjonen gir ei oversikt over kva tunnelar som har størst behov for opprusting og så byrjar me sikkert der, seier fylkesvaraordførar Terje Halleland frå Frp.