Av partia som er representert i fylkestinget i Rogaland så opplyser Arbeidarpartiet, Framstegspartiet og Kristeleg Folkeparti at dei er positive til
intensjonsavtalen om ein vestlandsregion. Det kjem fram i ein ringerunde NRK har gjort.
Dermed ligg det nå an til at det blir fleirtal for samanslåing, 26 av 47 representantar er positive, trass i at fleirtalet av innbyggarane i alle tre fylka er negative til storregion.
– Me seier ja med atterhald om at premissane i intensjonsavtalen blir innfridd. Det vil sei at det må koma nye og tyngre oppgåver i tillegg til at regionen får behalda kjerneoppdraga som den har i dag, seier Marianne Chesak frå Arbeidarpartiet til NRK.
- Les òg:
- Les òg:
Ventar på innbyggjarundersøking
Framstegspartiet sin leiar i fylket, Anita Egeli, seier at ho tidlegare har blitt feilsitert på at dei er negative til intensjonsavtalen, men gjer det klart at dei åtte representantane frå partiet hennar er positive.
– Me har eit vedtak frå fylkesårsmøte som seier at me skal gå for ein vestlandsregion. Dette vedtake var samrøystes i februar. Så ja, me er for, seier Egeli.
Ingen av fylkeslagsleiarane vil likevel ikkje slå fast kva dei vil stemma når saka skal opp i fylkestinget 13. og 14. desember. Dei vil ta med innbyggjarundersøkinga og høyringsrunden i totalvurderinga.
Dette gjeld også for dei som er negative til intensjonsavtalen.
– Fylkesstyret i Rogaland Høgre er i utgangspunktet negative til ein vestlandsregion. Me meiner det må tilførast oppgåver av stort omfang før Rogaland blir for lite. Den endelege avgjersla tek me likevel i fylkestinget i desember, seier Janne Johnsen, som er leiar i Rogaland Høgre.