Denne lyspæra har overlevd ein flykrasj og 70 år på havbotnen

Det var fleire flyentusiastar som fekk seg ei overrasking då ei lita lyspære blei sett inntil eit 9-volts-batteri i helga.

Pæra er ei av fleire smådelar etter eit tysk krigsfly, som har ligge på havbotnen i 70 år. Ingen hadde trudd at ho skulle fungera.

– Det var ei stor overrasking. Pæra såg ganske heil ut, men sokkelen var laus. Pæra blei reingjort og festa til sokkelen, så fungerte ho, seier Egil Endresen, som er styreleiar i venneforeininga til Flyhistorisk museum Sola.

Han reknar med at pæra blei produsert på 30-talet i Tyskland.

Nyheita om at ho fungerer overraskar også ekspert i energi- og næringslivshistorie på BI, Lars Thue.

– Dette er jo aldeles strålande og frykteleg morosamt. Eg vil også tippa at det er temmeleg unikt, seier Thue.

Bombeflyet som hamna på havbotnen

Det var 26. desember 1942 eit tysk bombefly av typen Heinkel 115 gjekk inn for landing i Hafrsfjord utanfor Stavanger.

Flyet skulle kunne landa på sjøen, men feste til den eine flottøren knakk. Dermed velta flyet og søkkte.

Luftwaffe-flyet står ikkje i dei offisielle tyske tapslistene, så at vraket med eit vengespenn på 22 meter låg på havbotnen var heilt ukjent fram til Sjøkartverket testa sonarutstyr i fjorden i 2005.

I 2012 blei flyet heist opp av entusiastar. Deretter blei det delt opp og lagt i ferskvatn i fleire år. Nå er den tidkrevjande jobben med å setja flyet saman igjen i gang på Flyhistorisk museum i Sola.

Det er i dette arbeidet lyspæra frå cockpiten blei tatt ut og testa.

– Det er ganske utruleg at ho framleis fungerer, seier Siegfried Hernes, som jobbar med å restaurere flyet.

• Les òg: Lyspæra i stabburet har lyst i over hundre år

Her blir vraket heist på land