– Bønder bør få betre plass til gjødsel

Jærbladet skriv at både Hå og Time kommune har fått inn mange søknader frå bønder med fulle gjødselslager i sprengkulda.

– Etter påsken har me fått minst 35 søknader om å hevda på frosen mark, seier landbrukssjef i Hå kommune, Olav Magne Tonstad.

• Les òg: Grønt i fjor, brunsvidd i år
• Les òg: – Vi taper mye penger hver dag

– Alle har fulle lager

Dette er bønder som ikkje har andre plassar å gjera av gjødsla, og derfor har også alle fått dispensasjon. Ein av desse er Anders Ueland.

– Denne våren kjem så seint at eg er heilt nøydd til å få ut noko lort. Alle andre har også fulle lager, det er derfor eg nå er inne på landbrukskontoret og søker om løyve, seier han til NRK.no.

Eigentleg skal ein ikkje gjødsla på frosen jord, sidan gjødsla kan renna ut i bekkar og vatn, i staden for å bli tatt opp av jorda.

Bør få større lagringsplass

Dispensasjonane gjeld derfor i hovudsak område langt frå vassdrag, men Naturvernforbundet liker likevel ikkje at det blir gjødsla for mykje.

Leiar i Rogaland, Erik Thoring, meiner at bøndene nå må byrja å rekna med denne typen seine vårar.

– Gjødslinga som skjer nå kan ein jo sjå på som nødverje, og truleg heilt nødvendig. Framover må ein likevel sjå på å få meir lagringsplass for gjødsel, bøndene må rett og slett kunna tola ein sein vår også i framtida, seier han.